മഞ്ഞയും ചുവപ്പും നിറങ്ങളിലുള്ള കന്നട പതാകയ്ക്ക് ഔദ്യോഗിക സംസ്ഥാന പതാക പദവി നൽകാനുള്ള നീക്കവുമായി കർണാടക സർക്കാർ. ഇതിനായി നിയമപരമായ ചട്ടക്കൂട് കൊണ്ടുവരുമെന്ന് മുഖ്യമന്ത്രി ഡി.കെ. ശിവകുമാർ അറിയിച്ചു. കർണാടക സംസ്ഥാന രൂപവത്കരണ ദിനത്തോടനുബന്ധിച്ച് നടന്ന രാജ്യോത്സവ സമ്മേളനത്തിലാണ് പ്രഖ്യാപനം. ഈ മാസം 30 മുതൽ ഡിസംബർ 11 വരെ ബെളഗാവിയിൽ നടക്കുന്ന നിയമസഭയുടെ ശൈത്യകാല സമ്മേളനത്തിൽ വിഷയം ചർച്ച ചെയ്യുമെന്നും മുഖ്യമന്ത്രി വ്യക്തമാക്കി.കന്നട പതാകയ്ക്ക് ഔദ്യോഗിക അംഗീകാരം നൽകണമെന്ന ആവശ്യം നേരത്തെയും സർക്കാർ ഉന്നയിച്ചിരുന്നു. ഇതുസംബന്ധിച്ച് മന്ത്രിസഭ തീരുമാനമെടുത്ത് കേന്ദ്രസർക്കാരിന് അപേക്ഷ നൽകിയെങ്കിലും അംഗീകാരം ലഭിച്ചില്ലെന്ന് ശിവകുമാർ പറഞ്ഞു. ദേശീയ പതാക ഉയർത്തുന്ന എല്ലാ സർക്കാർ കെട്ടിടങ്ങളിലും അതിനൊപ്പം കന്നട പതാകയും ഉയർത്തുന്നുണ്ടെന്ന് ഉറപ്പാക്കുകയാണ് പുതിയ നീക്കത്തിന്റെ ലക്ഷ്യം. സംസ്ഥാനത്തിന് സ്വന്തമായി ദേശീയഗാനം ഉള്ളതുപോലെ കന്നടക്കാരുടെ സാംസ്കാരിക സ്വത്വവും ആത്മാഭിമാനവും പ്രതിനിധീകരിക്കുന്ന ഔദ്യോഗിക പതാകയും വേണമെന്നാണ് സർക്കാരിന്റെ നിലപാട്.മഞ്ഞയും ചുവപ്പും നിറങ്ങളിലുള്ള പതാക ഇതിനകം കന്നഡിഗരുടെ വികാരങ്ങളുടെ പ്രതീകമായി മാറിയിട്ടുണ്ട്. കർണാടകയുടെ അറിവുപാരമ്പര്യം, സംസ്കാരം, മതസൗഹാർദ്ദം, സമാധാനം എന്നിവയാണ് പതാക പ്രതിഫലിപ്പിക്കുന്നതെന്ന് മുഖ്യമന്ത്രി പറഞ്ഞു. ഇന്ത്യയുടെ ഫെഡറൽ സംവിധാനത്തിനുള്ളിൽ സംസ്ഥാനത്തിന്റെ തനതായ സ്വത്വം കൂടുതൽ ശക്തിപ്പെടുത്തുന്നതാണ് ഔദ്യോഗിക പതാകയ്ക്ക് അംഗീകാരം ലഭിക്കുന്നതെന്നും അദ്ദേഹം കൂട്ടിച്ചേർത്തു.71-ാമത് കർണാടക രാജ്യോത്സവത്തിന്റെ ഭാഗമായി സ്കൂൾ വിദ്യാഭ്യാസ, സാക്ഷരതാ വകുപ്പ് സംഘടിപ്പിച്ച ചടങ്ങിൽ ശിവകുമാർ ദേശീയ പതാകയും കന്നട പതാകയും ഉയർത്തി. മാർച്ച് പാസ്റ്റിൽ പങ്കെടുത്ത വിദ്യാർഥികളുടെ സല്യൂട്ടും അദ്ദേഹം സ്വീകരിച്ചു. വിധാനസൗധ വളപ്പിലെ ഭുവനേശ്വരി ദേവിയുടെ പ്രതിമയിൽ പുഷ്പാർച്ചനയും നടത്തി. മന്ത്രി മധു ബംഗാരപ്പ, ചീഫ് സെക്രട്ടറി ഡോ. ശാലിനി രജനീഷ് തുടങ്ങിയവരും ചടങ്ങിൽ പങ്കെടുത്തു. നിയമസഭയുടെ ശൈത്യകാല സമ്മേളനത്തിലെ ചർച്ചയ്ക്ക് ശേഷം കന്നട പതാകയ്ക്ക് ഔദ്യോഗിക പദവി നൽകുന്നതിൽ സർക്കാർ എന്ത് തീരുമാനമെടുക്കുമെന്നാണ് ഇനി ശ്രദ്ധേയം.The post സർക്കാർ കെട്ടിടങ്ങളിൽ ദേശീയ പതാകയ്‌ക്കൊപ്പം കന്നട പതാകയും; ഔദ്യോഗിക പദവി നൽകാൻ കർണാടക സർക്കാർ appeared first on ഇവാർത്ത | Evartha.