മനാമ: അൽ ഹിലാൽ ഹെൽത്ത്‌കെയർ ഗ്രൂപ്പും മൈഗ്രന്റ് വർക്കേഴ്‌സ് പ്രൊട്ടക്ഷൻ സൊസൈറ്റിയും സംയുക്തമായി സംഘടിപ്പിച്ച ‘ലെറ്റ്‌സ് പെയിന്റ് ബഹ്‌റൈൻ പിങ്ക്’ സ്തനാർബുദ ബോധവൽക്കരണ മാസാചരണം വിജയകരമായി സമാപിച്ചു. ഒക്ടോബർ 14-ന് ആരംഭിച്ച ക്യാമ്പയിൻ ബഹ്‌റൈനിലെ മുഹറഖ് മുതൽ റിഫ വരെയുള്ള അൽ ഹിലാലിന്റെ 10 ശാഖകളിലായി സൗജന്യ സ്തനാർബുദ പരിശോധനയും മെഡിക്കൽ സെഷനുകളും സർഗ്ഗാത്മക പരിപാടികളും സംഘടിപ്പിച്ചു.മാധ്യമപ്രവർത്തകയും എം.ഡബ്ല്യു.പി.എസ് ബോർഡ് അംഗവുമായ രാജി ഉണ്ണികൃഷ്ണൻ ക്യുറേറ്റ് ചെയ്ത ഈ സി.എസ്.ആർ മുൻകൈയിൽ യുണീക്കോ, എസ്.ബി.ഐ ബഹ്‌റൈൻ, ന്യൂ മില്ലേനിയം സ്‌കൂൾ, ന്യൂ ഇന്ത്യൻ സ്‌കൂൾ, ഐ.സി.എ.ഐ ബഹ്‌റൈൻ ചാപ്റ്റർ എന്നിവരും പങ്കാളികളായി. രോഗം നേരത്തെ കണ്ടുപിടിക്കേണ്ടതിന്റെ പ്രാധാന്യത്തെക്കുറിച്ചുള്ള ഡോക്ടർമാരുടെ ക്ലാസുകൾക്ക് പുറമെ, സ്തനാർബുദത്തെ അതിജീവിച്ചവർ സ്വന്തം അനുഭവങ്ങൾ പങ്കുവെച്ചത് പങ്കെടുത്തവർക്ക് വലിയ പ്രചോദനമായി. മണ്ഡല ആർട്ട്, ബാഗ് പെയിന്റിംഗ്, സ്ട്രെസ് മാനേജ്‌മെന്റ് വർക്ക്‌ഷോപ്പുകൾ തുടങ്ങിയവയും ഇതോടൊപ്പമുണ്ടായിരുന്നു.സൽമാനിയയിലെ അൽ ഹിലാൽ പ്രീമിയർ ഹോസ്പിറ്റലിൽ നടന്ന സമാപന സംഗമത്തിൽ സുപ്രീം കൗൺസിൽ ഫോർ വുമൺ ബോർഡ് അംഗം എച്ച്.ഇ ഡോ. ബഹിയ അൽ ജിഷി മുഖ്യാതിഥിയായിരുന്നു. എം.ഡബ്ല്യു.പി.എസ് അധ്യക്ഷ മോന അൽ മൊയീദ്, ബഹ്‌റൈനിലെ ഇറ്റാലിയൻ അംബാസഡർ എച്ച്.ഇ ആന്ദ്രിയ കറ്റലാനോ, യുണീക്കോ ഗ്രൂപ്പ് സി.ഇ.ഒ ജയശങ്കർ വിശ്വനാഥൻ തുടങ്ങിയ പ്രമുഖർ സംബന്ധിച്ചു. ചടങ്ങിൽ സംഘടിപ്പിച്ച ‘ദി മൂവ്‌മെന്റ്’ കൂട്ടായ്മ ചിത്രരചനയുടെ ലേലത്തിലൂടെ എം.ഡബ്ല്യു.പി.എസിനായി 2,500-ലധികം ബഹ്‌റൈൻ ദിനാർ സമാഹരിച്ചു.ഒക്ടോബറിൽ നാൽപ്പതിലേറെ സൗജന്യ മാമോഗ്രാമുകളും നൂറോളം ബോധവൽക്കരണ പരിപാടികളും തങ്ങൾ നടത്തിയെന്നും, വീട്ടുജോലിക്കാർ ഉൾപ്പെടെ സമൂഹത്തിന്റെ എല്ലാ തുറകളിലുള്ളവരിലേക്കും കൃത്യസമയത്തുള്ള ഡോക്ടർ പരിശോധന എത്തിക്കുകയായിരുന്നു ലക്ഷ്യമെന്നും അൽ ഹിലാൽ ഹെൽത്ത്‌കെയർ ഗ്രൂപ്പ് സി.ഇ.ഒ ഡോ. ശരത് ചന്ദ്രൻ, ബിസിനസ്സ് വൈസ് പ്രസിഡന്റ് ആസിഫ് മുഹമ്മദ് എന്നിവർ വ്യക്തമാക്കി. വനിതാ ആരോഗ്യവും പ്രവാസി തൊഴിലാളികളുടെ ക്ഷേമവും മുൻനിർത്തി സംഘടിപ്പിച്ച ഈ പരിപാടി വലിയ വിജയമാക്കിയതിൽ രാജി ഉണ്ണികൃഷ്ണനും നന്ദി അറിയിച്ചു.The post അൽ ഹിലാലിന്റെ ‘ലെറ്റ്‌സ് പെയിന്റ് ബഹ്‌റൈൻ പിങ്ക്’ ക്യാമ്പയിന് സമാപനം; 10 ശാഖകളിലായി സ്തനാർബുദ ബോധവൽക്കരണവും സൗജന്യ പരിശോധനയും നടന്നു; സമാപന ചടങ്ങിൽ ആർട്ട് ലേലത്തിലൂടെ 2,500 ദിനാർ സമാഹരിച്ചു appeared first on Bahrain Vartha ബഹ്‌റൈൻ വാർത്ത.