مغربی بنگال کی سابق وزیر اعلیٰ اور ترنمول کانگریس کی سربراہ ممتا بنرجی کی بھتیجی برشٹی مکھرجی منگل کو بیربھوم ضلع کے رام پورہاٹ میں اپنے گھر میں پھندے سے لٹکی ہوئی ملیں۔ پولیس نے خودکشی کا شبہ ظاہر کیا ہے، تاہم موت کی اصل وجہ پوسٹ مارٹم رپورٹ آنے کے بعد ہی واضح ہونے کی بات کہی گئی ہے۔پولیس کے مطابق برشٹی مکھرجی کی لاش رام پورہاٹ تھانے کے علاقے میں واقع کسمبا گاؤں میں ان کے گھر کی دوسری منزل پر ایک کمرے سے ملی۔ اہل خانہ نے واقعے کی اطلاع پولیس کو دی، جس کے بعد رام پورہاٹ تھانے کے اہلکار موقع پر پہنچے اور لاش کو قبضے میں لے کر پوسٹ مارٹم کے لیے رام پورہاٹ گورنمنٹ میڈیکل کالج بھیج دیا۔ پولیس نے معاملے کی تفتیش شروع کر دی ہے۔برشٹی، ممتا بنرجی کے چچا زاد بھائی نہار مکھرجی کی بیٹی تھیں۔ نہار مکھرجی رام پورہاٹ-اول بلاک میں ترنمول کانگریس کے صدر بھی رہ چکے ہیں۔ ابھی تک یہ واضح نہیں ہو سکا ہے کہ برشٹی نے یہ قدم کیوں اٹھایا۔ تاہم، اہل خانہ اور مقامی ذرائع کے مطابق وہ گزشتہ کئی برس سے ذہنی صحت سے متعلق مسائل کا سامنا کر رہی تھیں اور ان کا علاج بھی جاری تھا۔ ان کے والد نہار مکھرجی نے بتایا کہ ان کی بیٹی گزشتہ پانچ سے چھ برس سے ذہنی صحت کے مسائل سے دوچار تھیں اور وہ باقاعدگی سے ڈاکٹر سے علاج کرا رہے تھے۔نہار مکھرجی نے کہا کہ انہیں سمجھ نہیں آ رہا کہ یہ سب کیسے ہوا، کیونکہ واقعے کے وقت خاندان کے افراد گھر کی نچلی منزل پر موجود تھے۔ مقامی ذرائع کے مطابق برشٹی اپنی ازدواجی زندگی میں بھی مشکلات کا سامنا کر رہی تھیں اور گزشتہ چند ماہ سے شوہر سے طلاق کا معاملہ چل رہا تھا۔ پولیس اس پہلو کی بھی جانچ کر رہی ہے کہ آیا خاندانی حالات کا ان کی موت سے کوئی تعلق تھا۔ بتایا گیا ہے کہ برشتی کا ایک 12 سالہ بچہ بھی ہے۔برشٹی مکھرجی کا نام مغربی بنگال میں مبینہ اسکول بھرتی گھوٹالے سے بھی جوڑا گیا تھا۔ ان پر پرائمری ٹیچر اور گروپ-سی ملازمتوں میں مبینہ بدعنوانی کے ذریعے تقرری حاصل کرنے کے الزامات لگے تھے۔ کلکتہ ہائی کورٹ کے احکامات کے بعد مغربی بنگال سینٹرل اسکول سروس کمیشن کی جانب سے جاری کی گئی ملازمتیں منسوخ کرنے والی فہرست میں بھی ان کا نام شامل تھا۔ فہرست میں برشتی کا نام 608ویں نمبر پر بتایا گیا تھا۔تاہم، رپورٹ کے مطابق برشٹی نے ملازمت حاصل کرنے کے چند ہی دن بعد ذاتی وجوہات کا حوالہ دیتے ہوئے استعفیٰ دے دیا تھا۔پولیس کا کہنا ہے کہ فی الحال موت کی وجہ کے بارے میں حتمی طور پر کچھ کہنا قبل از وقت ہوگا۔ پوسٹ مارٹم رپورٹ اور تفتیش کی بنیاد پر ہی معاملے کی مزید تفصیلات سامنے آ سکیں گی۔ برشٹی کی موت کی خبر سے رام پورہاٹ اور آس پاس کے علاقے میں غم کی لہر دوڑ گئی ہے۔