ഇന്ത്യൻ വ്യോമസേനയിൽ പുതിയ യുദ്ധവിമാനങ്ങൾ ഉൾപ്പെടുത്തുന്നതിലെ കാലതാമസം രാജ്യത്തിന്റെ പ്രതിരോധ ശേഷിയെ പ്രതികൂലമായി ബാധിക്കുന്നതായി വ്യോമസേനാ മേധാവി എയർ ചീഫ് മാർഷൽ എ.പി. സിങ്. വ്യോമസേനാ ദിനത്തിന് മുന്നോടിയായി നടത്തിയ വാർത്താസമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്.സേനയുടെ പോരാട്ടശേഷി നിലനിർത്തുന്നതിനും നിലവിലുള്ള സൈനിക ശേഷിയിലെ വിടവുകൾ നികത്തുന്നതിനുമായി രാജ്യത്ത് പ്രതിവർഷം 36 മുതൽ 40 വരെ യുദ്ധവിമാനങ്ങൾ നിർമിച്ച് നൽകേണ്ടതുണ്ടെന്ന് എ.പി. സിങ് പറഞ്ഞു.നിലവിൽ ഇന്ത്യൻ വ്യോമസേനയ്ക്ക് 30 സ്ക്വാഡ്രണുകളാണുള്ളത്. ശേഷി ഇനിയും കുറയാതിരിക്കാനും അനുവദനീയമായ 42 സ്ക്വാഡ്രണുകളെന്ന ലക്ഷ്യത്തിലേക്ക് എത്തിച്ചേരാനും പ്രതിവർഷം കുറഞ്ഞത് രണ്ട് സ്ക്വാഡ്രണുകൾക്ക് ആവശ്യമായ വിമാനങ്ങൾ നിർമിക്കേണ്ടതുണ്ടെന്നും അദ്ദേഹം വ്യക്തമാക്കി.എൽസിഎ എംകെ-1എ, പുതിയ മൾട്ടി റോൾ ഫൈറ്റർ എയർക്രാഫ്റ്റുകൾ, അധിക സുഖോയ്-30 എംകെഐ വിമാനങ്ങൾ എന്നിവ സമയബന്ധിതമായി വ്യോമസേനയുടെ ഭാഗമാക്കുന്നതിനാണ് നിലവിൽ മുൻഗണന നൽകുന്നത്. ഇതിന് പുറമെ അഞ്ചാം തലമുറ യുദ്ധവിമാനങ്ങൾ എത്രയും വേഗം സേനയിൽ ഉൾപ്പെടുത്തേണ്ടതിന്റെ ആവശ്യകതയും വ്യോമസേനാ മേധാവി ചൂണ്ടിക്കാട്ടി.അതിർത്തിയിലെ സുരക്ഷാ വെല്ലുവിളികൾ വർധിക്കുന്ന സാഹചര്യത്തിൽ ചൈനയുടെ അഞ്ചാം തലമുറ സ്റ്റെൽത്ത് യുദ്ധവിമാനങ്ങൾ പാകിസ്താന് ലഭിക്കാനുള്ള സാധ്യത ആശങ്കാജനകമാണെന്നും എ.പി. സിങ് പറഞ്ഞു. ചൈനീസ് നിർമിത അത്യാധുനിക യുദ്ധവിമാനങ്ങൾ പറത്തുന്നതിനായി പാകിസ്താൻ പൈലറ്റുമാർക്ക് പരിശീലനം നൽകിവരുന്നതായും അദ്ദേഹം വെളിപ്പെടുത്തി.അതേസമയം, ദുബായ്–ടെൽ അവീവ് ഫ്ലൈ ദുബായ് വിമാനത്തിലുണ്ടായ ആക്രമണശ്രമത്തിനിടെ അസാധാരണമായ ധൈര്യവും മാനസിക ദൃഢതയും പ്രകടിപ്പിച്ച ക്യാപ്റ്റൻ സ്മിത് മച്ചാറിനെ എ.പി. സിങ് പ്രശംസിച്ചു. അടിയന്തര സാഹചര്യത്തിൽ മച്ചാർ പ്രകടിപ്പിച്ച മനക്കരുത്തും ധീരതയും വ്യോമയാന മേഖലയിലുള്ള എല്ലാവർക്കും വലിയൊരു പാഠമാണെന്നും വ്യോമസേനാ മേധാവി പറഞ്ഞു.The post യുദ്ധവിമാനങ്ങളുടെ വരവ് വൈകുന്നത് പ്രതിരോധ ശേഷിയെ ബാധിക്കുന്നു; മുന്നറിയിപ്പുമായി വ്യോമസേനാ മേധാവി appeared first on ഇവാർത്ത | Evartha.