Un deberá cumprir tres anos e tres meses de prisión e o outro, dous anos e tres meses. Dous irmáns pontevedreses entrarán no cárcere por descapitalizar empresas para eludir o pago de débedas. A condena acábaa de impor a sección cuarta da Audiencia Provincial de Pontevedra, que os considera autores dun delito de frustración da execución e aplica a circunstancia atenuante de dilacións indebidas. A Audiencia considera que, postos de común acordo e co fin de continuar a actividade empresarial que iniciara o seu pai, realizaron actos de descapitalización das empresas nas que participaban co obxectivo de "eludir o pago das débedas contraídas cos seus acredores públicos e privados". Os maxistrados subliñan que, a pesar de ser coñecedores tanto da débeda contraída como dos embargos trabados sobre os seus bens, "seguiron comercializando con eles e obstaculizando o efectivo cobro por parte dos seus acredores". Os dous eran xestores de Comercial Senra e todas as compañías afectadas dedicábanse á actividade de comercialización de maquinaria e utillaje industrial e agrícola. O fallo xudicial declara probado que os dous irmáns "participaron activamente" nunha sucesión empresarial encamiñada a eludir o pago das débedas xurdidas a partir da anterior e ao traspaso de bens dunhas a outras empresas, co fin de dificultar o cobro dos seus acredores". Atribuíaselles tamén un delito contra a Seguridade Social, pois sostiña a acusación que tiñan unha débeda coa Seguridade Social en contía suficiente para ser constitutiva de delito, pero a Audiencia absólvelles. Conclúe que da proba practicada "non quedou xustificada a existencia dun artificio, ardid ou simulación claramente encamiñado a eludir o pago das cotas á Seguridade Social". Excúlpanlles dese delito porque, segundo o tribunal, "tampouco é posible afirmar coa seguridade e certeza que esixe o proceso penal a existencia dun artificio ou ardid deseñado polos acusados co ánimo de defraudar á Seguridade Social ao tempo de aflorar a débeda". A sentenza non é firme, pois cabe presentar recurso ante o Tribunal Superior de Xustiza de Galicia (TSXG).