O Pleno extraordinario do Concello de Poio acordou por unanimidade conceder a máxima distinción municipal a dúas institucións fundamentais para a seguridade no municipio: a Agrupación de Voluntarios de Protección Civil de Poio e a Comandancia da Garda Civil de Pontevedra. A Medalla de Ouro constitúe unha das máis altas distincións recollidas no Regulamento de Honras e Distincións municipal, coa que se pretende expresar o agradecemento da veciñanza pola incansable labor de ambas entidades. Protección Civil de Poio, creada en 1994, conta actualmente con máis de 35 voluntarios de entre 17 e 66 anos que ofrecen o seu tempo de maneira altruísta. Durante tres décadas estivo na primeira liña en emerxencias como incendios, inundacións, temporais e accidentes, ademais de brindar apoio en eventos culturais e deportivos como sucedeu, días atrás, coa etapa de La Vuelta. Representantes de Protección Civil de Poio en La VueltaProtección Civil de Poio A concelleira de Seguridade Cidadá, Maritxe González, destacou o seu papel en acontecementos como o accidente do Prestige, a traxedia do Novo Marcos ou a pandemia da COVID-19, converténdose nun referente non só en Poio senón en toda Galicia. Pola súa banda, a Comandancia da Garda Civil de Pontevedra realiza en Poio unha media anual de máis de 4.000 actuacións que inclúen desde apoio a vítimas de violencia de xénero ata operativos de tráfico e investigacións. Nas últimas décadas foi clave na erradicación de puntos de venda de drogas e na súa axuda durante as riadas e incendios de 2006. Actos da patroa da Garda Civil na comandanciaPontevedraViva O alcalde, Ángel Moldes, resaltou que "o mellor recoñecemento que podemos facerlle é amosar este consenso e unidade que hoxe demostramos para agradecer a súa colaboración e apoio constante". As medallas entregaranse nas próximas semanas. OUTROS ASUNTOS No pleno ordinario de setembro, celebrado tamén onte, a corporación aprobou modificar a axuda destinada ao programa Vacacións en Paz, que este ano non contou con ningunha familia participante, para destinala ao programa "Urxencia alimentaria nos campamentos de refuxiados saharauis". Ademais, outorgáronse axudas económicas aos deportistas locais Alejandro López Meira, na modalidade de ciclismo, e Lola Ferro Guiance, en ximnasia rítmica, en recoñecemento pola súa carreira e éxitos deportivos. En resposta ás mocións da oposición sobre sanidade e incendios, a concelleira Rocío Cochón defendeu a xestión do goberno local, recordando que Poio conta con brigada propia de prevención contra incendios e que durante este verán os lumes afectaron aproximadamente 0,2 hectáreas no municipio. Pleno de setembro en PoioConcello de Poio