O Concello de Vilagarcía convocou a licitación para renovar integralmente o sistema de xestión do aparcamento Xoán XXIII, cun investimento de 123.000 euros. O prazo para que as empresas presenten as súas propostas remata o 15 de outubro a través da Plataforma de Contratación do Estado. A modernización contempla a substitución completa dos sistemas de control, accesos, pagamentos e videovigilancia desta infraestrutura de tres plantas con capacidade para 240 vehículos. O proxecto inclúe tamén a instalación dun novo sistema de interfonía e a migración de toda a información do sistema anterior. Tras asumir a xestión directa do aparcamento en 2024, o goberno local pretende facilitar a mobilidade no centro urbano mediante a implantación de bonificacións para os vilagarciáns e incentivos para quen realice compras no comercio local. A renovación tecnolóxica tamén permitirá ampliar os horarios de funcionamento. O contrato establece un prazo de execución de tres meses e inclúe a formación do persoal municipal que se encargará da xestión. Neste sentido, nos próximos orzamentos preveuse a convocatoria dunha praza pública para estas tarefas. Esta actuación enmárcase na liña de mellorar a mobilidade urbana, que tamén inclúe a rede de aparcamentos disuasorios gratuítos Vaicar!