O Pontevedra CF anunciou este domingo a incorporación de Ander Vidorreta ao seu plantel para a próxima tempada. O centrocampista, de 28 anos, chega ao conxunto granate tras unha ampla experiencia en Primeira RFEF, ademais de participar en seis partidos co Numancia en Segunda División durante a campaña 2019-2020. Formado en equipos como a SD Tarazona, CD Calahorra, Real Avilés Industrial e Real Unión Club, Vidorreta destaca pola súa regularidade e por ser un dos xogadores máis importantes nos equipos nos que estivo. Concretamente, defendendo as cores do Real Avilés, foi o futbolista máis utilizado polos técnicos Chiqui de Paz, Astu e Emilio Cañedo, acumulando 2.664 minutos repartidos en 40 partidos, 32 de liga en Segunda RFEF e 8 na Copa Federación. O seu rendemento non pasou desapercibido e valeulle para dar o salto ao CD Calahorra en Primeira RFEF, onde volveu erixirse como peza crave. Alí sumou 3.187 minutos en 36 partidos de liga, todos eles como titular, e en 33 xogou o encontro completo, sendo indispensable tanto para Juan García como para Carlos Pouso. Coa súa chegada a Pasarón, Vidorreta achegará experiencia, solidez e criterio á medular do Pontevedra, que segue perfilando o seu persoal de face á nova campaña en Primeira RFEF.