Na mañá deste mércores, diante da oficina de Correos de Sanxenxo, traballadoras e traballadores da Unidade de Reparto concentráronse xunto á CIG para esixir medidas inmediatas ante a "acumulación de envíos e a falta de persoal" que, din, está a colapsar o servizo local. Segundo os propios representantes sindicais, a quenda de mañá presenta seis prazas sen cubrir por xubilacións, vacantes e baixas por incapacidade temporal, situación que obriga ao resto do persoal a asumir seccións adicionais. A CIG asegura que, en lugar de reforzar o servizo nun municipio que pasa dos 17.000 residentes a cifras moito maiores no verán, onde en 2024 superáronse os 750.000 visitantes, o cadro de persoal reduciuse nun 40 %, situación que se traduce en sobrecarga física e psíquica para os repartidores. Os representantes denunciaron tamén o incremento do tráfico e a escaseza de estacionamento como obstáculos adicionais para cumprir as rutas asignadas, con atascos e retencións que complican as distribucións. Na Unidade de Reparto de Sanxenxo permanecen, segundo a CIG, varios miles de envíos ordinarios sen repartir e un número relevante de envío rexistrados (notificacións e certificados), o que preocupa pola demora no servizo aos veciños. Mentres non se resolvan estas peticións, o cadro sindical anunciou que manterá as mobilizacións en próximas datas ata obter unha resposta da dirección de Correos.