లార్డ్స్ టెస్టులో టీమిండియా నిలకడగా రాణిస్తోంది. రెండో రోజు లంచ్ బ్రేక్ తర్వాత మొదటి ఇన్నింగ్స్ ప్రారంభించిన టీమిండియా ఆరంభంలోనే ఓపెనర్ జైస్వాల్ వికెట్ కోల్పోయింది. కర్ణాటక బాయ్స్ కేఎల్ రాహుల్, కరుణ్ నాయర్ కొంతసేపు మ్యాచ్‌ని నిలబెట్టారు. కరుణ్ నాయర్, గిల్ అవుటవ్వడంతో ఇబ్బందుల్లో పడ్డ టీమిండియా బాధ్యత తీసుకున్నాడు. రెండో రోజు ఆటముగిసే సమయానికి టీమిండియా 3 వికెట్ల నష్టానికి 145 పరుగులు చేసింది.ఇంగ్లండ్ - ఇండియా మధ్య జరుగుతున్న అండర్సన్ - టెండూల్కర్ సిరీస్ మూడో టెస్టు రసవత్తరంగా సాగుతోంది. ఆరంభంలోనే మూడు ఫోర్లు బాది ఫామ్‌లో ఉన్న యశస్వి జైస్వాల్‌ను జోఫ్రా ఆర్చర్ పెవిలియన్‌కు పంపాడు. 8 బంతులు ఆడిన జైస్వాల్ 13 పరుగులు చేసి అవుటయ్యాడు. దాంతో టీమిండియా 13 పరుగులకే తొలి వికెట్ కోల్పోయింది. కేఎల్ రాహుల్, కరుణ్ నాయర్ రెండో వికెట్‌కు 61 పరుగులు భాగస్వామ్యం నెలకొల్పారు. హాఫ్ సెంచరీ దిశగా వెళ్తున్న కరుణ్ నాయర్‌ను జో రూట్ అద్భుతమైన క్యాచ్ పట్టి అవుట్ చేశాడు. బెన్ స్టోక్స్ వేసిన బంతిని కరుణ్ నాయర్ అడ్డుపెట్టగా అది స్లిప్‌లోకి వెళ్లింది. జో రూట్ దాన్ని అద్భుతంగా క్యాచ్ అందుకున్నాడు. 62 బంతులు ఆడిన కరుణ్ నాయర్ నాలుగు ఫోర్లతో 40 పరుగులు చేసి అవుటయ్యాడు. ఆ తర్వాత కెప్టెన్ శుభమన్ గిల్ కేవలం 16 పరుగులకే పెవిలియన్ బాట పట్టాడు. గత టెస్టులో డబుల్ సెంచరీ, సెంచరీ చేసిన గిల్ ఈ మ్యాచ్‌లో మాత్రం నిరాశ పరిచాడు.107 పరుగులకే మూడు వికెట్లు కోల్పోయిన టీమిండియాను కేఎల్ రాహుల్, ఆదుకున్నారు. ఎడమ చేతి వేలి గాయంతో కీపింగ్‌కి దూరమైన పంత్.. బ్యాటింగ్‌కి అందుబాటులోకి రావడంతో అభిమానులు సంతోషం వ్యక్తం చేశారు. గాయమైనప్పటికీ నిదానంగా ఆడుతూ మరో వికెట్ పడకుండా జాగ్రత్త పడ్డాడు. ఈ క్రమంలోనే కేఎల్ రాహుల్ తన హాఫ్ సెంచరీ పూర్తి చేసుకున్నాడు. రెండో రోజు ఆట ముగిసే సమయానికి టీమిండియా 3 వికెట్ల నష్టానికి 145 పరుగులు చేసింది. కేఎల్ రాహుల్ 53, రిషబ్ పంత్ 19 పరుగులతో క్రీజులో కొనసాగుతున్నారు. మొదటి ఇన్నింగ్స్‌లో భారత్ ఆధిక్యం సాధించాలంటే ఇంకా 243 పరుగులు చేయాల్సి ఉంది. అంతకు ముందు మొదటి ఇన్నింగ్స్‌లో ఇంగ్లండ్ జట్టు 387 పరుగులకు ఆలౌట్ అయింది. జో రూట్ సెంచరీతో పాటు జెమీ స్మిత్, బ్రైడన్ కార్స్ హాఫ్ సెంచరీలతో రాణించారు. జస్ప్రిత్ బుమ్రా ఐదు వికెట్లతో మెరవగా.. మహమ్మద్ సిరాజ్, నితీష్ కుమార్ రెడ్డి చెరి రెండు వికెట్లు తీసుకున్నారు.