ദുബൈ| ദുബൈയിലെ തർക്കങ്ങൾ പരിഹരിക്കുന്നതിനുള്ള അനുരഞ്ജന ചട്ടക്കൂടുകൾ സംബന്ധിച്ച നിയമം യു എ ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് അൽ മക്തൂം പുറപ്പെടുവിച്ചു. 2021 ലെ (18) നിയമത്തിലെ ചില വ്യവസ്ഥകൾ ഭേദഗതി ചെയ്തുകൊണ്ട് പുറത്തിറക്കിയ 2025 ലെ നിയമം നമ്പർ (9) സമൂഹത്തിലെ ഓരോ അംഗത്തിനും ഉയർന്ന നിലവാരത്തിലുള്ള കാര്യക്ഷമതയും സേവനങ്ങളും ഉറപ്പാക്കുന്നതിനിടയിൽ എമിറേറ്റിന്റെ നിയമപരമായ ചട്ടക്കൂട് മെച്ചപ്പെടുത്തുന്നതിനുള്ള ശ്രമങ്ങളുടെ ഭാഗമാണ്.നിർബന്ധിത ഒത്തുതീർപ്പ് ശ്രമങ്ങൾക്ക് യോഗ്യതയുള്ള തർക്കങ്ങളുടെ വിഭാഗങ്ങളെക്കുറിച്ച് നിയമം വിശദീകരിക്കുന്നു. അനുരഞ്ജന പ്രക്രിയയിൽ നിന്ന് ഒഴിവാക്കപ്പെടുന്ന ചില തർക്കങ്ങളും ഇതിൽ പറയുന്നുണ്ട്. ഇടക്കാല ഉത്തരവുകൾ, അടിയന്തിര കേസുകൾ, രക്ഷാകർതൃത്വ കാര്യങ്ങൾ, പിന്തുടർച്ചാവകാശം തുടങ്ങിയവ ഇതിൽ ഉൾപ്പെടുന്നു. വിവാഹം, വിവാഹമോചനം പോലുള്ള കേസുകളിലും ദുബൈ കോടതികളുടെ അധികാരപരിധിക്ക് പുറത്തുള്ള തർക്കങ്ങളിലും അനുരഞ്ജനം പരിഗണിക്കില്ല. അനുരഞ്ജനം വിജയകരമാണെങ്കിൽ കക്ഷികൾ ഒപ്പുവെച്ച ഒരു കരാറിൽ അത് രേഖപ്പെടുത്തുകയും അതിന് നിയമപരമായ അംഗീകാരം നൽകുകയും ചെയ്യും.