O Palacete das Mendoza acollerá a partir do vindeiro venres, 18 de xullo, a exposición 'Contrastes', da Asociación Artística e Cultural de Pontevedra. A inauguración está prevista para as 18.30 horas do venres, segundo a información facilitada pola Deputación de Pontevedra. A mostra poderá visitarse ata o 3 de agosto na sala de exposicións do Palacete. Recolle obras fotográficas e pictóricas elaboradas por un total de 22 usuarios e usuarias da entidade. Os horarios de visita serán os de apertura da sede de Turismo Rías Baixas: de luns a venres ininterrompidamente de 9:00 a 21:00 horas, e os sábados, domingos e festivos de 10:00 a 14:30 e de 16:30 a 20:00 horas. A exposición inclúe obras de Zsuzsi Kanyo, Violeta Arisha Tasende, Santiago Sancho, Remedios Priegue, Pili Soliño, Mauricio Rodríguez, Mª Jesús G. Burgueño, Mª Teresa Calvo, Mª José Pérez, Lola Couto, Lino Souto, Kuqui Pazos, Isabel Leyes, Eulogio Tordesillas, Elena Fdez. de Dios, Dalia Ponte, Carmen Payo, Carmen Martín, Carmen Gago, Carmen Álvaro, Cajete e Ángeles Fondevila. Co seu título, 'Contrastes', fai alusión á revista que a asociación leva publicando desde o ano 1998 e que na actualidade recibe o nome de 'Los Contrastes del Arte', e rende tributo ao labor que fai o colectivo desde a súa fundación en 1996. A Asociación Artística e Cultural de Pontevedra está formada por arredor de 55 socios, entre pintores, poetas, fotógrafos, escritores e amantes da cultura en xeral.