తెలుగు సినీ ఇండస్ట్రీలో వరుస విషాదాలు చోటుచేసుకుంటున్నాయి. ఆదివారం విలక్షణ నటుడు కోట శ్రీనివాసరావు మరణించగా, సోమవారం అలనాటి టాప్ హీరోయిన్ బి.సరోజా దేవి కన్నుమూశారు. ఈ విషాదాల నుంచి తేరుకునేలోగానే టాలీవుడ్‌లో మరో విషాదం చోటుచేసుకుంది. అగ్ర హీరో రవితేజ తండ్రి రాజగోపాల్ రాజు మంగళవారం రాత్రి కన్నుమూశారు. ఆయన వయసు 90 ఏళ్లు. కొంతకాలంగా వయోభారానికి తోడు అనారోగ్య సమస్యలతో బాధపడుతోన్న ఆయన మంగళవారం రాత్రి ఇంట్లోనే తుదిశ్వాస విడిచారు. రాజగోపాల్ రాజు అంత్యక్రియలు బుధవారం నిర్వహించనున్నట్లు కుటుంబసభ్యులు తెలిపారు. ఈ విషయం తెలియగానే సినీ ప్రముఖులు, అభిమానులు సంతాపం వ్యక్తం చేస్తూ సోషల్‌మీడియాలో పోస్టులు పెడుతున్నారు. ఈ కష్టకాలంలో రవితేజకు ఆ దేవుడు అండగా ఉండాలని ప్రార్థిస్తున్నారు.