A Policía Nacional sacou a cabalaría para axudar a previr incendios forestais e axudar a dar seguridade ao Camiño de Santiago ao seu paso por Pontevedra. Literalmente. Pois seis cabalos policías xa patrullan as localidades das Rías Baixas dentro da campaña especial da Unidade de Cabalaría da Policía Nacional despregada cada verán. O subdelegado do Goberno en Ponteveda, Abel Losada, e o comisario provincial, Juan José Díaz Jiménez, presentaron este luns a presenza da unidade na provincia, acompañado polo subinspector responsable, Julio Serrano. Non só estarán en Pontevedra, senón en toda Galicia. En total, hai 12 cabalos e 20 axentes despregados na comunidade, a metade na base norte e a outra na zona sur. O subdelegado e o comisario, coa Unidade de Cabalaría da Policía Nacional "Traballamos en todo Galicia, desde Viveiro, a zona máis afastada, a zona máis norte, até Ourense, pasando por Lugo, Monforte, Ribeira ou Marín, por suposto", explicou Julio Serrano. Fano de luns a domingo, en quendas de mañá e tarde e, ademais do labor xenérico de seguridade ao Camiño de Santiago e prevención de incendios forestais, responden as demandas da Xefatura Superior de Galicia. Esta semana, estando fóra de servizo, alertaron de dous incendios en Marín e, na zona norte, centraron o seu labor en colaborar na procura de desaparecidos en Lugo. Respecto diso, o subinspector Serrano explicou: "o noso labor é primordialmente preventiva e disuasoria, á vez". Juan José Diaz Jiménez, Tino Lores e Abel Losada, coa Unidade de Cabalaría da Policía NacionalPontevedraViva Estes seis cabalos despregados na zona sur realizarán patrullas preventivas polas localidades que están en demarcación da Policía Nacional. Ademais, a Garda Civil tamén conta cunha unidade de cabalaría que fai o propio na súa xurisdición. Abel Losada destacou este luns que se trata dunha colaboración que se realiza "desde hai anos" e que é "moi apreciada polos propios concellos nos que ten lugar", ademais de resultar "fundamental" nos seus dous labores. Para recoñecer este traballo achegouse este luns até a Alameda de Pontevedra o presidente da asociación de amigos do Camiño Portugués, Tino Lores, que quixo aproveitar e pousar cos cabalos policías. "O feito de que leven anos é capital acumulado e significa experiencia, cada vez máis, e, por tanto, o traballo que se desenvolve é plena satisfacción para todos", destacou Losada. Esta unidade, procedente da Comisaría Xeral de Seguridade Cidadá en Madrid, estará despregada en Galicia até o 30 de setembro. Subinspector Julio Serrano, da Unidade de Cabalaría da Policía NacionalPontevedraViva