Coa mesma proba coa que arrancou hai dez anos, unha travesía a nado entre a illa de Ons e Sanxenxo, a Tripla Coroa Illas Atlánticas celebrará a súa primeira década de vida. Será, como xa se anunciou, o sábado 6 de setembro. Na proba, que se presentou este xoves, participarán un total de 134 deportistas (108 homes e 26 mulleres), dos cales doce son de nacionalidade estranxeira. Todos eles percorrerán o trece quilómetros que separan a praia de Area dos Cans, en Ons, e a praia de Silgar, en Sanxenxo. Os participantes da travesía a nado, procedentes de España, Francia, Andorra, Ucraína, Italia e Portugal, teñen idades comprendidas entre os 21 e os 68 anos. Un total de dez nadadores, segundo avanzou a organización, tratarán de completar esta travesía a nado na categoría sen neopreno, a máis exixente da proba. A esta cita especial acudirán os gañadores das tres edicións da Tripla Coroa Illas Atlánticas, fóra da vasca Andrea de la Hera, que non poderá acudir nesta ocasión por ter un compromiso con outras competicións internacionais. Así, estarán o portugués Hugo Alberto Cardoso Rodrigues Alves Ribeiro e a madrileña Rebeca Santos Arriaga (gañadores en 2015-2017), o ourensán Alberto Taboada Vila (2018-2021) e a asturiana Patricia Agüera Fernández e o canario Aldo Román Gutiérrez Llanos (2022-2024). A responsable desta competición, Beatriz Alvariño, destacou que a travesía será competitiva desde a saída e terá unha "chegada espectacular" na praia de Silgar. "O seis primeiros quilómetros serán os máis duros da proba debido ás correntes e a ondada na entrada da ría de Pontevedra ata que cheguen á costa", sinalou a directora da proba. Este ano, como novidade, celebraranse dous percorridos infantís gratuítos na praia de Silgar de 50 metros (para nenos entre 5 e 8 anos) e 150 metros (de 9 a 13 anos). As inscricións estarán abertas até o 25 de agosto na páxina web de www.championchipnorte.com. Para o desenvolvemento da proba despregarase un amplo dispositivo de seguridade na ría de Pontevedra, tanto no mar como en terra, con embarcacións e kaiaks seguindo aos nadadores, que levarán un GPS para o seu seguimento a través de Internet. Os nadadores sairán da praia de Area dos Cans a partir das 08:40 horas en cinco grupos segundo os ritmos de nado até as 10:35 horas. A organización espera que os primeiros nadadores cheguen a meta en dúas horas e media, é dicir, sobre a unha da tarde. No caso de que as condicións meteorolóxicas non permitisen a saída desde Ons, a organización ten previsto un percorrido alternativo de 13 quilómetros con saída e chegada na praia de Silgar. Durante a travesía estableceranse tres puntos de avituallamento e controis de tempo nos quilómetros 3,5, 7 e 10 de obrigado paso para todos os participantes onde poderán comer (froita, xeles e barriñas enerxéticas) e beber para reporse do esforzo. ACTIVIDADES PARALELAS Xunto coa travesía está prevista unha serie de actividades como a visita guiada á illa de Ons para os familiares e acompañantes dos nadadores, en colaboración co Parque Nacional das Illas Atlánticas de Galicia. Haberá ademais un concurso de fotografía e diversa accións ambientais, entre elas unha xornada da limpeza na praia de Area dos Cans, na illa de Ons.