కొందరు జరిగిన సంఘటనలనో, కధలనో చెబుతుంటే ఎంతసేపయినా ఊ కొడుతూ వినాలనిపిస్తుంది. మరికొందరు చెబుతుంటే కాలం భారంగా కదులుతుంటుంది. దానికి కారణం చెప్పాలనుకున్న విషయం ఎంత గొప్పదైనా చెప్పే విధానం ఉత్సుకత కలిగించేలా ఉండటం లేదా ఉండకపోవటం. వెండితెరపై చెప్పాలనుకున్న కధని ఉత్సుకత కలిగించే "దృశ్యమాలిక"గా రూపొందించే ప్రక్రియనే "స్క్రీన్‌ప్లే" అంటారు. ఓసారి మా తమిళమిత్రుడు ‘విజయ్’ తమిళనాట అగ్ర రచయితగా వెలుగొందిన ‘సుజాత(రంగరాజన్)’ గారు తమిళంలో రాసిన ‘తిరైక్కదై ఎళుదువదు ఎప్పడి’(స్క్రీన్‌ప్లే రాయటం ఎలా)అనే పుస్తకం ఇస్తే చదివాను. అప్పటికి "సిడ్‌ఫీల్డ్" వంటివారు రాసిన స్క్రీన్‌ప్లే పుస్తకాలు కొన్ని చదివిఉన్నప్పటికీ ఆ పుస్తకం మరింత ఆకట్టుకుంది. కారణం మనకి తెలిసిన, మనం చూసిన రోజా.. ఒకేఒక్కడు.. అపరిచితుడు లాంటి సినిమాలను ఉదహరిస్తూ స్క్రీన్‌ప్లే ఎలాఉండాలో ఎలా ఉండకూడదో అరటిపండు ఒలిచిపెట్టినట్టు అందులో వివరించటమే ().ఆ పుస్తకాన్ని ఎవరైనా తెలుగులోకి అనువదిస్తే మనవాళ్ళకు ఎంతో ఉపయోగపడుతుంది కదా అనుకొనేవాడిని. లబ్ధప్రతిష్టులైన దర్శకులు మారుతి, రచయిత డార్లింగ్ స్వామిగార్లు ఈ పుస్తకాన్ని తెలుగులో తెచ్చారని తెలిసి సంతోషించాను. తమిళంలో చదివేసినదే కదా అనుకున్నాను. కానీ ఇది కొంతమేరకు స్వేఛ్చానువాదం అని తెలిశాక తెప్పించుకొని చదువుదాము అనుకొంటున్నంతలో స్వయంగా డార్లింగ్ స్వామిగారే ఇంటికొచ్చిమరీ పుస్తకం చేతిలో పెట్టటంతో పండగ మొదలైంది నాకు.అనువాదంలో స్వామి గారు పాటించిన భాషాసరళత.. ఏకబిగిన చదివింపచేసిందీ పుస్తకాన్ని. అనుభవమున్న సినీ రచయితైన డార్లింగ్ స్వామి గారు అనువదించటం ఖచ్చితంగా ఈ రచనకు అదనపు బలం. మన చుట్టూ ఉండే మనుషుల జీవితాలూ, జరిగే సంఘటనలూ అన్నీ కధలే. వాటిని సినిమా కధలుగా ఎలా రూపొందించాలో నేర్పుతుందీ పుస్తకం. ఈ పుస్తకానికి సినీ ప్రముఖులు రాసిన ముందుమాటల్లో, రచయిత రాసిన చివరిమాటల్లో కూడా నాబోటివాళ్ళు అండర్‌లైన్ చేసుకోవలసిన వాక్యాలు, నేర్చుకోదగిన అంశాలు ఎన్నో ఉండటం బోనస్. సినీ రచయితలు, దర్శకులు, కాగోరేవారి అందరిదగ్గరా తప్పక ఉండవలసిన పుస్తకం. సినీప్రియుల లైబ్రరీలలో ఉండతగిన పుస్తకం. అన్వీక్షికి వారి సాహితీవనంలో మొలిచిన మరో చేవగల్గిన మొక్క "స్క్రీన్‌ప్లే". -దేవీప్రసాద్ (రచయిత, ప్రముఖ నటుడు, దర్శకుడు). నటుడు, దర్శకుడు దేవీప్రసాద్ గురించి.. సీనియర్ నటుడు దేవీ శ్రీప్రసాద్ 30కి పైగా చిత్రాల్లో కీలకపాత్రలు పోషించారు. అయోధ్య రామయ్య, నీదీ నాదీ ఒకే కథ, కథానాయకుడు, కల్కి, క్రాక్, నాంది, శ్రీకారం, విరాట పర్వం, మా నాన్న సూపర్ హీరో ఇలా చాలా చిత్రాల్లో నటించారు. హీరో, హీరోయన్‌కి తండ్రి పాత్రల్లో ఎక్కువగా నటించారు. ఇక కేవలం నటుడే కాదు.. మంచి రచయిత దర్శకుడు కూడా. సీనియర్ దర్శకుడు కోడి రామకృష్ణ దగ్గర అసిస్టెంట్‌గా పని చేసిన దేవీ ప్రసాద్.. ఆడుతూ పాడుతూ, లీలా మహల్ సెంటర్, పాండు, బ్లేడ్ బాబ్జీ, మిస్టర్ పెళ్లి కొడుకు, కెవ్వుకేక చిత్రాలకు దర్శకత్వం వహించారు. అయితే సినిమాలకు సంబంధించి ఆసక్తికరమైన విషయాలను ఫేస్ బుక్ ద్వారా తెలియజేస్తూ ఉంటారు దేవిప్రసాద్. ఆయన రచనా శైలికి చాలామంది అభిమానులున్నారు.