టాలీవుడ్ లో చాలా రోజులుగా వార్తల్లోనే ఉన్న ప్రాజెక్ట్ 'ఎల్లమ్మ'. 'బలగం' వంటి బ్లాక్ బస్టర్ హిట్ తర్వాత కమెడియన్ కమ్ డైరెక్టర్ వేణు యెల్దండి లైన్ లో పెట్టుకున్న సినిమా ఇది. ఎన్నో నెలలుగా ఈ స్క్రిప్ట్ మీద వర్క్ చేస్తున్నారు. బలగం వచ్చి రెండున్నరేళ్లు దాటిపోయింది కానీ, ఈ చిత్రం మాత్రం పట్టాలెక్కలెక్కడం లేదు. కొబ్బరికాయ ఎప్పుడు కొడతారో తెలియడం లేదు. అయితే ఇప్పుడు ఈ సినిమాలో హీరోకి సంబంధించి ఓ రూమర్ సోషల్ మీడియాలో చక్కర్లు కొడుతోంది. 'బలగం' తర్వాత దిల్ రాజు ప్రొడక్షన్ లోనే మరో సినిమా చేయడానికి వేణు కమిట్ అయ్యారు. 'ఎల్లమ్మ' కథ రాసుకొని దిల్ రాజును మెప్పించారు. ఆ స్క్రిప్ట్‌ పట్టుకుని చాలా చోట్లకు తిరిగాడు వేణు. ముందుగా హీరో నాని వద్దకు వెళ్లాడు. ఆయనకు కథ నచ్చడంతో ప్రాజెక్ట్ ఫిక్స్ అయిందని అందరూ అనుకున్నారు. కానీ నాని ఇతర కమిట్ మెంట్స్ కారణంగా కాంబినేషన్ వర్కౌట్ కాలేదు. దీంతో ఆ కథ హీరో నితిన్ దగ్గరకు చేరింది. అతనికి కూడా స్క్రిప్ట్ నచ్చడంతో వెంటనే గ్రీన్ సిగ్నల్ ఇచ్చేశాడు. నితిన్ హీరోగా 'ఎల్లమ్మ' అనే టైటిల్ తో సినిమా తెరకెక్కనుందని దిల్ రాజు స్వయంగా ప్రకటించారు. 'తమ్ముడు' సినిమా రిలీజైన తర్వాత షూటింగ్ మొదలు పెడతామని చెప్పారు. అప్పుడే మహానటి కీర్తి సురేష్ ను హీరోయిన్ గా తీసుకున్నారని టాక్ వచ్చింది. అద్భుతమైన కథతో రాబోతున్నామని నితిన్ ఓ ఇంటర్వ్యూలో చెబితే.. ఈ మూవీతో నితిన్ కెరీర్ నెక్స్ట్ లెవల్ కి చేరుతుందని దిల్ రాజు ధీమా వ్యక్తం చేశారు. అయితే వీరిద్దరూ ఎన్నో ఆశలు పెట్టుకున్న 'తమ్ముడు' సినిమా డిజాస్టర్ గా మారింది. ఈ ఎఫెక్ట్ ఇప్పుడు 'ఎల్లమ్మ' పై పడిందనే పుకార్లు ఇండస్ట్రీలో షికార్లు చేస్తున్నాయి.నితిన్ తో చేయాలనుకున్న 'ఎల్లమ్మ' కథ.. ఇప్పుడు మరో హీరో శర్వానంద్ వద్దకు చేరిందని రూమర్స్ వినిపిస్తున్నాయి. నితిన్ ఈ ప్రాజెక్ట్ నుంచి తప్పుకున్నారని, అతని స్థానంలో శర్వాని లీడ్ రోల్ లోకి తీసుకోడానికి ప్రయత్నాలు జరుగుతున్నాయని జోరుగా ప్రచారం సాగుతోంది. ఇందులో నిజమెంతనేది తెలియదు కానీ.. ఎల్లమ్మ చేతులు మారిందనే వార్త నెట్టింట వైరల్ గా మారింది. మరి మేకర్స్ దీనిపై క్లారిటీ ఇస్తారేమో చూడాలి. కమెడియన్ గా తనకంటూ ప్రత్యేకమైన గుర్తింపు తెచ్చుకున్న వేణు.. 'బలగం' సినిమాతో డైరెక్టర్ గా తనలోని మరో కోణాన్ని పరిచయం చేశాడు. తన కామెడీతో ప్రేక్షకులను కడుపుబ్బా నవ్వించిన ఆయన.. దర్శకుడిగా తన మొదటి సినిమాతో అందర్నీ ఏడిపించేసాడు. తెలంగాణ మట్టి వాసనను, సంస్కృతీ సంప్రదాయాలను, భావోద్వేగాలను అద్భుతంగా తెర మీద ఆవిష్కరించారు. ఒక హాస్యనటుడిలో ఇలాంటి ఎమోషన్స్ ఉన్నాయా అని అందరూ ఆశ్చర్యపోయారు. 'ఎల్లమ్మ' సినిమాలోనూ బలమైన కథ ఉంటుందని సినీ వర్గాల్లో టాక్ ఉంది. ఏ హీరోతో చేసినా బొమ్మ అదిరిపోతుందని అనుకుంటున్నారు. మరి త్వరలోనే వేణు రెండో చిత్రానికి మోక్షం కలుగుతుందేమో చూడాలి.