చిరంజీవి.. ఇది పేరు కాదు, ఇండియన్ సినిమాలో ఇదొక బ్రాండ్. ఎలాంటి సినీ బ్యాగ్రౌండ్ లేకుండా, ఒక సామాన్య మధ్యతరగతి కుటుంబం నుంచి ఇండస్ట్రీకి వచ్చి, కేవలం తన టాలెంట్ తో స్వయంకృషితో 'మెగాస్టార్' స్థాయికి ఎదిగిన ఆయన జీవితం ఎందరికో ఆదర్శనీయం.. స్ఫూర్తిదాయకం. గత నాలుగున్నర దశాబ్దాలుగా సినీ ప్రియులను అలరిస్తున్న చిరు.. బాక్సాఫీస్ హిట్లకు మారు పేరుగా నిలిచారు.. తిరుగులేని స్టార్ డమ్ సంపాదించుకున్నారు. రికార్డుల్లో ఆయన పేరు ఉండటం కాదు.. ఆయన పేరు మీదుగానే రికార్డులు ఉంటాయనిపించుకున్నారు. అయితే చిరు ఇండస్ట్రీకి వస్తూనే మెగాస్టార్ అయిపోలేదు. కొణిదెల శివ శంకరప్రసాద్ అనే వ్యక్తి సినీ రంగంలో ఎవరెస్ట్ శిఖరం అంత ఎత్తుకు ఎదగడం వెనుక ఎన్నో ఏళ్ల కృషి, శ్రమ, పట్టుదల, అకుంఠిత దీక్ష, సినిమాల పట్ల అంకిత భావం ఉన్నాయి. నేడు టాలీవుడ్ 'గాడ్ ఫాదర్' 70వ పుట్టినరోజు సందర్భంగా ఆయన సినీ, వ్యక్తిగత జీవితంలోని విశేషాలు మీకోసం...చిరంజీవి ఫ్యామిలీ బ్యాగ్రౌండ్ ఇదే..చిరంజీవి 1955 ఆగస్టు 22న పశ్చిమ గోదావరి జిల్లా, మొగల్తూరులో కానిస్టేబుల్ కొణిదెల వెంకట్రావు, అంజనాదేవి దంపతులకు జన్మించారు. ఆయన అసలు పేరు కొణిదెల శివ శంకర వరప్రసాద్. చిన్నతనం నుంచే నాటకాలపై, నటనపై ఆయనకు విపరీతమైన ఆసక్తి ఉండేది. నర్సాపూర్లో కాలేజీ విద్యను పూర్తి చేసుకుని, ఆ తర్వాత మద్రాసు ఫిల్మ్ ఇన్‌స్టిట్యూట్‌లో నటనలో శిక్షణ తీసుకున్నారు. ఆ సమయంలో మద్రాసులో ఆయనకు ఎదురైన కష్టాలు, కన్నీళ్లు అన్నీ అన్నీ కాదు. తిండికి కూడా ఇబ్బందులు పడిన రోజులు, బస్సులు లేక కిలోమీటర్ల కొద్దీ నడిచిన రోజులు ఉన్నాయి. అయినా సరే ఆయన ఎప్పుడూ తన లక్ష్యం నుంచి దృష్టిని మళ్లించలేదు. ఎన్ని కష్టాలు ఎదురైనా, సినీ ఇండస్ట్రీలో అడుగుపెట్టాలనే దృఢ సంకల్పంతో మొక్కవోని ధైర్యంతో ముందుకు సాగారు.చిరు ప్రస్థానానికి పునాది..చిరంజీవి 'పునాది రాళ్లు' సినిమాతో నటుడిగా తెరంగేట్రం చేశారు. కానీ 'ప్రాణం ఖరీదు' చిత్రం ముందుగా విడుదలై, ఆయన్ను వెండితెరపై ప్రేక్షకులకు పరిచయం చేసింది. 'మనవూరి పాండవులు' సినిమా గుర్తింపు తెచ్చిపెట్టింది. కెరీర్ ప్రారంభంలో సపోర్టింగ్ రోల్స్ చేసిన చిరు.. కొన్ని చిత్రాల్లో విలన్ గానూ మెప్పించారు. అయితే ఆయన ప్రతిభను గుర్తించిన కొందరు దర్శక నిర్మాతలు హీరోగా ప్రోత్సహించారు. తనకు వచ్చిన ప్రతీ అవకాశాన్ని సద్వినియోగం చేసుకుంటూ, ఎదురైన సవాళ్లను స్వీకరిస్తూ తెలుగు చిత్ర పరిశ్రమలో నిలదొక్కుకున్నారు.ప్రేక్షకుల హృదయాల్లో 'ఖైదీ'..1980వ దశకం చిరంజీవి సినీ జీవితంలో ఒక గొప్ప దశ అని చెప్పాలి. ఈ దశాబ్దంలో ఆయన ఎన్నో విజయవంతమైన చిత్రాల్లో నటించారు. ముఖ్యంగా 'ఖైదీ' సినిమా ఆయనకు తిరుగులేని స్టార్‌డమ్‌ను తెచ్చిపెట్టింది. సుప్రీం హీరోని చేసింది.. ఆయన కెరీర్‌లో ఒక మైలురాయిగా నిలిచిపోయింది. అక్కడి నుంచి ఆయన వెనక్కి తిరిగి చూసుకోవాల్సిన అవసరం రాలేదు. ఆ సమయంలోనే చిరంజీవి తన సినిమాల ద్వారా డిఫరెంట్ డ్యాన్స్ లను, స్టైలిష్ యాక్షన్ ఫైట్ సీక్వెన్స్‌లను తెలుగు ప్రేక్షకులకు పరిచయం చేశారు. ఇవే ఆయన్ను మిగతా హీరోల కంటే ప్రత్యేకంగా నిలబెట్టాయి. తెలుగు సినిమాపై చిరు ఆధిపత్యం..'దొంగ', 'కొండవీటి దొంగ', 'ఛాలెంజ్', 'మంచిదొంగ', 'కొదమసింహం', 'జగదేకవీరుడు-అతిలోకసుందరి', 'గ్యాంగ్ లీడర్', 'రౌడీ అల్లుడు', 'ఘరానా మొగుడు', 'ముఠా మేస్త్రి'.. వంటి సినిమాలతో చిరంజీవి 90స్ లో తెలుగు సినిమా పరిశ్రమలో తన ఆధిపత్యాన్ని కొనసాగించారు. ఆ తర్వాత ఎన్నో బాక్సాఫీస్ రికార్డులను తిరగరాసారు. తెలుగులోనే కాదు, దేశ వ్యాప్తంగా ఫ్యాన్ ఫాలోయింగ్ సంపాదించుకున్నారు. 'ప్రతిబంధ్', 'ఆజ్ కా గుండారాజ్', 'ది జెంటిల్ మెన్' వంటి హిందీ చిత్రాల్లోనూ చిరు నటించారు. రెండు తమిళ, రెండు కన్నడ సినిమాలు కూడా చేశారు. ఇప్పటి వరకూ ఆయన మొత్తం 155 చిత్రాల్లో నటించారు. ప్రస్తుతం విశ్వంభర, మన శంకర వరప్రసాద్ సినిమాల్లో నటిస్తున్నారు.నటుడిగానే కాకుండా..చిరంజీవి గొప్ప నటుడు మాత్రమే కాదు, అంతకుమించి మానవతావాది కూడా. 'చిరంజీవి ఛారిటబుల్ ట్రస్ట్' స్థాపించి సామాజిక సేవా కార్యక్రమాలు నిర్వహిస్తున్నారు. ఆ ట్రస్ట్ ద్వారా రక్తదానం, నేత్రదానం వంటి సేవలు అందిస్తూ ఆపద్బాంధవుడు, అందరివాడు అనిపించుకున్నారు. ఆయన సేవలు మెచ్చి భారత ప్రభుత్వం 2006లో 'పద్మభూషణ్' అవార్డుతో సత్కరించింది. 2024లో దేశ రెండో అత్యున్నత పౌర పురస్కారమైన 'పద్మవిభూషణ్' వరించింది. ఇది ఆయన సినీ జీవితానికి, సమాజానికి చేసిన సేవకు లభించిన ఒక గొప్ప గౌరవం అని చెప్పాలి. ఇక చిరంజీవి గతేడాది తన డ్యాన్సులతో గిన్నిస్ బుక్ ఆఫ్ రికార్డ్స్ లో ఎక్కారు. టాలీవుడ్ 'గాడ్ ఫాదర్'కు పుట్టినరోజు శుభాకాంక్షలు.. చిరంజీవి ఒక కష్టజీవి, ఒక మార్గదర్శి, ఒక గొప్ప మానవతావాది. ఆయన జీవితం ఓ చరిత్ర.. ఓ పాఠం.. ఓ అధ్యాయం.. ఓ అధ్యయనం.. ఓ విశ్వవిద్యాలయం. ఆయన తెలుగు సినిమా పరిశ్రమకు ఒక గాడ్‌ఫాదర్.. టార్చ్ బేరర్. అఖిలాంధ్ర ప్రేక్షకులకు ఆరాధ్యుడు. తెలుగు సినిమా చరిత్ర దశ, దిశని మార్చిన అతి కొద్దిమంది నటుల్లో ముఖ్యుడు. భారతీయ సినీ చరిత్రలో తనకంటూ ఓ అధ్యాయాన్ని లిఖించుకున్న మెగాస్టార్ చిరంజీవి 70వ పుట్టినరోజు సందర్భంగా శుభాకాంక్షలు తెలియజేస్తూ.. ఆయన ఇలాంటి బర్త్ డేలు మరెన్నో జరుపుకోవాలని, తన సినిమాలతో అభిమానులను అలరించాలని, ఇంకా ఎన్నో విజయాలు సాధించాలని 'సమయం తెలుగు' టీమ్ కోరుకుంటోంది.