O Concello de Ribadumia rematou a ampliación da rede municipal de abastecemento de auga no Lugar da Igrexa, situado na parroquia de Sisán, nunha actuación financiada integramente con fondos propios municipais. A intervención permitiu conectar esta zona á rede municipal, proporcionando por primeira vez acceso a este servizo básico a unha área que ata agora carecía desta infraestrutura esencial. A obra mellora substancialmente as condicións de habitabilidade e a calidade de vida dos veciños da zona. Esta actuación do goberno local pretende modernizar e reforzar as redes de abastecemento en todo o municipio, co obxectivo de garantir un servizo seguro, estable e eficiente en todos os núcleos de poboación. O Concello reafirma con esta obra o seu compromiso de executar proxectos que dean resposta ás necesidades da cidadanía e aseguren o correcto funcionamento das infraestruturas municipais no futuro. O alcalde David Castro achegouse ata a zona durante a realización dos traballos.