A emoción do teatro regresa a Pontevedra coa nova tempada de abonos de Afundación, que contará con nomes de primeiro nivel como Ana Torrent, Gabino Diego, Natalia Dicenta e a incombustible Lola Herrera. O pano alzarase o próximo 3 de outubro cunha potente adaptación de "As amargas bágoas de Petra von Kant", o clásico do cine e a escena dos anos 70, nunha versión que promete emocionar ao público coa intensa interpretación de Ana Torrent. A programación continuará o 14 de novembro con "Pixama para seis", unha divertida comedia de enredos que traerá a escena a Gabino Diego á fronte dunha repartición chea de ritmo e gargalladas. "Camiño á Meca", o espectáculo construído sobre un texto do autor surafricano Athol Fugard, pechará a Tempada de abonos o 11 de decembro. É unha obra que trata sobre o illamento, a loita interna, e o conflito entre conformarse coas expectativas da sociedade ou seguir os soños propios. As amargas bágoas de Petra von Kant A obra "As amargas bágoas de Petra von Kant" é unha nova versión dun dos textos teatrais máis importantes de Europa nos últimos anos do século XX. O tamén escritor cineasta Rainer Wener Fassbinder asinou en 1971 o libreto da obra. Un ano despois, levaríao con gran éxito ao cine. A obra conta a historia dunha deseñadora de modas que, despois de divorciarse, namórase dunha modelo coa que colabora. As dinámicas de poder na relación, ou o emprego do diñeiro ou o sexo como ferramentas de poder, forman parte da trama. Ana Torrent comparte elenco no espectáculo con Aura Garrido, Maribel Vitar, Julia Monje e María Luisa San José. Pixama para seis Xa o 14 de novembro, e tamén en clave de comedia, chega á Sede de Afundación en Pontevedra "Pixama para seis", asinada polo dramaturgo francés Mar Camoletti en 1987. Gabino Diego protagoniza o espectáculo, unha historia que xira ao redor do amor, dos celos, ou da confianza. Pixama para seis conta o sucedido cando o protagonista da historia, Fernando, aproveita a ausencia da súa parella para convidar ao seu amante a pasar un fin de semana con el. Nada sucederá de acordo ao previsto. Completan o elenco Isabel Gaudi, Amaia Vargas, Sabina Praga, Jesús Cisneros. Camiño á Meca "Camiño á Meca", a obra protagonizada por Lola Herrera, Natalia Dicenta e Carlos Olalla, pechará a tempada o 11 de decembro. Recupera a historia dos anos nos que a escultora surafricana Helen Martins, xa viúva, vive obsesionada con crear un xardín de esculturas orientadas cara á Meca mentres mantén difíciles relacións coa comunidade na que vive, en 1974 e en pleno apartheid.