കേരളം കണ്ട ഏറ്റവും വലിയ അതിജീവനത്തിൻ്റെ കഥയാണ് മണ്ടക്കൈ ചൂരൽമല. രാത്രിയും പകലുമില്ലാതെ ഒറ്റക്കെട്ടായി പ്രയത്നിച്ചതിൻ്റെ ഫലം. ആ നാടിനെ ചേർത്ത് പിടിച്ച സർക്കാർ ഇപ്പോൾ കരുതലിൻ്റെ പുതു ചരിത്രം കുറിക്കുകയാണ്. സർവതും നഷ്ടപ്പെട്ട ജനങ്ങൾക്ക് വീട് എന്ന സ്വപ്നം യാഥാർഥ്യമാക്കിയ സർക്കാർ ഈ മാസം 25 ന് 178 വീടുകളുടെ താക്കോലുകൾ കൈമാറുകയാണ്. ഈ നാടിനെ സംരക്ഷിക്കാൻ ഒന്നായി പൊരുതിയ എല്ലാവരേയും ഈ ചടങ്ങിലേക്ക് സ്വാഗതം ചെയ്തിരിക്കുകയാണ് മുഖ്യമന്ത്രി പിണറായി വിജയൻ. ചരിത്ര നിമിഷത്തിന് സാക്ഷ്യം വഹിക്കാൻ രക്ഷാപ്രവർത്തനത്തിൽ പങ്കുചേർന്നവരെയും പുനരധിവാസത്തിനായി അകമഴിഞ്ഞു സഹായങ്ങൾ നൽകിയവരേയും ഹൃദയപൂർവ്വം ക്ഷണിക്കുകയാണെന്ന് മുഖ്യമന്ത്രി ഫേസ്ബുക്കിൽ കുറിച്ചു.Also read: നാടിനെ അപകീർത്തിപ്പെടുത്തുന്ന കേരളാ സ്റ്റോറി പോലുള്ള സിനിമകൾ നിർമിക്കുന്നു: ഇതിനെതിരെ കുട്ടികളും അവബോധരാകണമെന്ന് മുഖ്യമന്ത്രിഫേസ്ബുക്ക് കുറിപ്പിൻ്റെ പൂർണരൂപംനാടിനെയാകെ നടുക്കിയതും വേദനയുടെ നിഴലിലാഴ്ത്തിയതുമായ സംഭവമായിരുന്നു 2024 ജൂലൈ 30 ന് മുണ്ടക്കൈ-ചൂരൽമല പ്രദേശത്തുണ്ടായ ഉരുൾപൊട്ടൽ ദുരന്തം. ഒരു രാത്രി ഇരുട്ടിവെളുത്തപ്പോൾ ഒരു നാട് തന്നെ മണ്ണിനടിയിലായ വാർത്ത ഉൾക്കിടിലത്തോടെയാണ് നാം കേട്ടത്. ആ മഹാദുരന്തത്തിൽ എല്ലാം നഷ്ടപ്പെട്ടവരെ ചേർത്തുപിടിക്കാൻ ഈ നാട് ഒന്നടങ്കം രംഗത്തു വന്നു. മന്ത്രിമാർ, ജനപ്രതിനിധികൾ, ആരോഗ്യ പ്രവർത്തകർ, സേനാ സംവിധാനങ്ങൾ, സന്നദ്ധസേനാ പ്രവർത്തകർ, സംഘടനാ പ്രവർത്തകർ, ശുചീകരണ തൊഴിലാളികൾ തുടങ്ങി നാനാ മേഖലകളിൽ നിന്നുമുള്ളവർ സമാനതകളില്ലാത്ത വിധം രക്ഷാപ്രവർത്തനത്തിൽ പങ്കുചേർന്നതോടെയാണ് ദുരന്തത്തിന്റെ ആദ്യ നാളുകളെ നാം അതിജീവിച്ചത്. ഇതിന്റെ തുടർച്ചയായി ദുരന്തത്തിൽ കിടപ്പാടവും ജീവനോപാധികളും നഷ്ടപ്പെട്ടവർക്ക് ലോകോത്തര നിലവാരത്തിൽ പുനരധിവാസം ഉറപ്പാക്കുമെന്ന് അന്ന് എൽഡിഎഫ് സർക്കാർ ഉറപ്പുനൽകിയിരുന്നു. ദുരന്തബാധിതർക്കായി സർക്കാർ ഒരുക്കുന്ന ടൗൺഷിപ്പ് ഫേസ്-1 ന്റെ ഭാഗമായി 178 വീടുകൾ ഫെബ്രുവരി 25-ന് ഉദ്ഘാടനം ചെയ്യുകയാണ്. ഈ ചരിത്ര നിമിഷത്തിന് സാക്ഷ്യം വഹിക്കാൻ രക്ഷാപ്രവർത്തനത്തിൽ പങ്കുചേർന്നവരെയും പുനരധിവാസത്തിനായി അകമഴിഞ്ഞു സഹായങ്ങൾ നൽകിയവരേയും ഹൃദയപൂർവ്വം ക്ഷണിക്കുകയാണ്. എല്ലാവരും അന്നേ ദിവസം കൽപ്പറ്റ എൽസ്റ്റൺ എസ്റ്റേറ്റിൽ എത്തിച്ചേരുമെന്ന് പ്രതീക്ഷിക്കുന്നു. ഒറ്റക്കെട്ടായി നാം തീർത്ത അതിജീവനത്തിന്റെ ഈ റിയൽ കേരള സ്റ്റോറി ലോകത്തിന് മുന്നിൽ മഹത്തായ മാതൃകയായി ഉയർന്നുനിൽക്കും.The post ‘നാം തീർത്ത അതിജീവനത്തിന്റെ റിയൽ കേരള സ്റ്റോറി ലോകത്തിന് മാതൃകയാകും’;ടൗൺഷിപ്പ് താക്കോൽദാന ചടങ്ങിലേക്ക് ക്ഷണിച്ച് മുഖ്യമന്ത്രി appeared first on Kairali News | Kairali News Live.