ചെന്നൈയിലെ ബ്രിട്ടീഷ് ഡെപ്യൂട്ടി ഹൈക്കമ്മീഷനിലെ ഡെപ്യൂട്ടി ഹെഡ് ഓഫ് മിഷൻ ശാലിനി മേദിപ്പള്ളിയും കമ്മ്യൂണിക്കേഷൻ ഓഫീസർ ഇന്നൊസെൻഷ്യ അച്ചയ്യയും ഭക്ഷ്യ പൊതുവിതരണ വകുപ്പ് മന്ത്രി ജി.ആർ.അനിലിനെ സന്ദർശിച്ച് ഉഭയകക്ഷി താൽപ്പര്യമുള്ള വിഷയങ്ങൾ ചർച്ച ചെയ്തു. ഭക്ഷ്യക്കമ്മീഷൻ ചെയർമാൻ ഡോ: ജിനു സഖറിയ ഉമ്മനും ചർച്ചകളിൽ പങ്കെടുത്തു.കേരളത്തിലെ പൊതുവിതരണ രംഗത്തിന്റെ ചരിത്രപ്രാധാന്യത്തെക്കുറിച്ചും പ്രവർത്തനക്ഷമതയെ പറ്റിയും മന്ത്രി വിശദീകരിച്ചു. ഉപഭോക്തൃ സംസ്ഥാനമായ കേരളത്തിൽ വിലക്കയറ്റം പിടിച്ചുനിർത്തുന്നതിൽ സർക്കാർ നടത്തുന്ന ഇടപെടലുകൾ മന്ത്രി വിശദീകരിച്ചു. ഉത്സവ സമയങ്ങളിൽ സപ്ലൈകോ വിപണിയിൽ നടത്തുന്ന വിപുലമായ ഇടപെടലുകളെ കുറിച്ചും മന്ത്രി സംസാരിച്ചു.ദരിദ്ര-ദുർബല ജനവിഭാഗങ്ങൾക്ക് കൊടുക്കുന്ന പ്രത്യേക പരിഗണന, വിദൂര സ്ഥലങ്ങളിൽ ഉൽപന്നങ്ങൾ എത്തിക്കുന്ന സഞ്ചരിക്കുന്ന റേഷൻകടകൾ, പൊതുവിതരണ സംവിധാനത്തിന്റെ ആധുനിക മുഖമായ കെ സ്റ്റോറുകൾ, കിടപ്പ് രോഗികൾക്ക് ഓട്ടോറിക്ഷ തൊഴിലാളികളുടെ സഹായത്തോടെ റേഷൻ വിഹിതം എത്തിച്ചു നൽകുന്ന ‘ഒപ്പം’ പദ്ധതി എന്നിവയെപ്പറ്റിയും മന്ത്രി വിശദീകരിച്ചു. കേരളം ഈ മേഖലയിൽ നടത്തുന്ന പ്രവർത്തനങ്ങൾ മാതൃകാപരമാണെന്ന് ബ്രിട്ടീഷ് ഹൈക്കമ്മീഷൻ ഉദ്യോഗസ്ഥർ അഭിപ്രായപ്പെട്ടു.