కరీంనగర్ శివారులోని ప్రైవేట్ మెడికల్ కాలేజీలో చోటుచేసుకున్న సంఘటన స్థానికంగా పెద్ద చర్చకు దారితీసింది. ఒక పురుషుడు బుర్ఖా ధరించి మహిళల బాత్రూమ్‌లోకి ప్రవేశించడం గమనించిన సిబ్బంది వెంటనే అప్రమత్తమయ్యారు. అతని వెంట స్కార్ఫ్ ధరించిన మరో మహిళ కూడా ఉండటం మరింత అనుమానాలను రేకెత్తించింది. సెక్యూరిటీ సిబ్బంది వీరిని ఆపి తనిఖీ చేయగా వాస్తవం బయటపడింది. బుర్ఖా తొలగించిన తరువాత వ్యక్తి పురుషుడని, అతని వెంటున్నది మహిళేనని నిర్ధారించారు. ఈ సంఘటన విద్యార్థులు, కాలేజీ వర్గాల్లో కలకలం సృష్టించింది. సెక్యూరిటీ సిబ్బంది వారిని అదుపులోకి తీసుకొని వెంటనే పోలీసులకు అప్పగించారు. పోలీసులు దర్యాప్తు ప్రారంభించి.. ఈ జంట ఉద్దేశ్యం ఏమిటన్న దానిపై దృష్టి సారించారు. వారు నిజంగా దొంగతనం చేసేందుకా? లేక మరేదైనా అసాంఘిక చర్యకు ప్రయత్నించారా? అన్న అనుమానాలు వ్యక్తమవుతున్నాయి. పోలీసులు సీసీటీవీ ఫుటేజీలు పరిశీలిస్తూ, వారి నేపథ్యం గురించి లోతుగా విచారణ చేస్తున్నారు. మెడికల్ కాలేజీ వంటి విద్యా సంస్థల్లో భద్రతా చర్యలు మరింత కఠినంగా ఉండాలి అని ఈ సంఘటన సూచిస్తోంది. ప్రత్యేకంగా మహిళల భద్రతకు సంబంధించిన ప్రాంతాల్లో ఎవరి అనుమానాస్పద కదలికలు గమనించినా వెంటనే చర్యలు తీసుకోవాలని విద్యార్థులు డిమాండ్ చేస్తున్నారు. విద్యార్థినులు భయాందోళన వ్యక్తం చేస్తూ.. భవిష్యత్తులో ఇలాంటి ఘటనలు జరగకుండా పోలీసులు రక్షణ పెంచాలని కోరుతున్నారు. ప్రస్తుత కాలంలో నేరగాళ్లు వేషాలు మార్చుకుని నేరాలకు పాల్పడటం కొత్తేమీ కాదు. కానీ మహిళల బాత్రూమ్‌లోకి దూరేందుకు బుర్ఖా వాడడం ఆందోళన కలిగించే పరిణామంగా మారింది. నేరగాళ్ల మానసిక ధోరణి ఏ స్థాయికి దిగజారిందో ఈ సంఘటన స్పష్టంగా తెలియజేస్తోంది. సామాజిక వర్గాలు కూడా దీనిపై స్పందిస్తూ.. ఇటువంటి సంఘటనలు మళ్లీ జరగకుండా కఠిన చర్యలు తీసుకోవాలని కోరుతున్నాయి. ఈ కేసు దర్యాప్తు త్వరగా పూర్తి చేసి.. వాస్తవాలు బహిర్గతం చేయాలని ప్రజలు కోరుతున్నారు. కాలేజీలో ఇటువంటి ఘటన జరగడంతో విద్యార్థుల తల్లిదండ్రులు తీవ్ర ఆందోళన వ్యక్తం చేస్తున్నారు. పటిష్టమైన భద్రత ఏర్పాటు చేయాల్సిన అవసరం ఉందని కాలేజీ యాజమాన్యాన్ని డిమాండ్ చేస్తున్నారు.