അബുദാബി: യുഎഇ തലസ്ഥാനമായ അബുദാബിയിലെ ഖലീഫ ഇക്കണോമിക് സോൺ പരിസരത്ത് മിസൈൽ അവശിഷ്ടങ്ങൾ പതിച്ചുണ്ടായ മൂന്ന് വ്യത്യസ്ത തീപിടുത്തങ്ങളിൽ അഞ്ച് ഇന്ത്യക്കാരടക്കം ആറ് പേർക്ക് പരിക്കേറ്റു.അന്തരീക്ഷത്തിൽ വെച്ച് യുഎഇ വ്യോമ പ്രതിരോധ സേന വിജയകരമായി തകർത്ത ബാലിസ്റ്റിക് മിസൈലിന്റെ ഭാഗങ്ങൾ താഴേക്ക് പതിച്ചതാണ് അപകടത്തിന് കാരണമായത്.കിസാദ് വ്യവസായ മേഖലയുടെ പരിസരത്തുള്ള മൂന്ന് ഇടങ്ങളിലാണ് മിസൈൽ ശകലങ്ങൾ വീണ് തീപിടുത്തമുണ്ടായത്. സിവിൽ ഡിഫൻസ് വിഭാഗം ഉടനടി സ്ഥലത്തെത്തി തീ നിയന്ത്രണവിധേയമാക്കി.യുഎഇയുടെ മിസൈൽ വിരുദ്ധ പ്രതിരോധ സംവിധാനങ്ങൾ മിസൈലിനെ ലക്ഷ്യസ്ഥാനത്ത് എത്തുന്നതിന് മുൻപ് തന്നെ ആകാശത്തുവെച്ച് തകർക്കുകയായിരുന്നു. ഇതേത്തുടർന്ന് ചിതറിത്തെറിച്ച അവശിഷ്ടങ്ങളാണ് ജനവാസ മേഖലയ്ക്ക് സമീപം പതിച്ചത്.പരിക്കേറ്റവരിൽ അഞ്ച് പേർ ഇന്ത്യൻ പൗരന്മാരും ഒരാൾ പാകിസ്ഥാൻ പൗരനുമാണെന്ന് അബുദാബി മീഡിയ ഓഫീസ് സ്ഥിരീകരിച്ചു. ഇവരെ ഉടൻ തന്നെ ആശുപത്രിയിൽ പ്രവേശിപ്പിച്ചതായും അധികൃതർ അറിയിച്ചു, ആരുടേയും പരിക്ക് ഗുരുതരമല്ല.സംഭവസ്ഥലത്ത് അടിയന്തര സേനകൾ എത്തി ആവശ്യമായ എല്ലാ സുരക്ഷാ നടപടികളും സ്വീകരിച്ചിട്ടുണ്ട്. അബുദാബിയിലെ സ്ഥിതിഗതികൾ നിലവിൽ പൂർണ്ണ നിയന്ത്രണവിധേയമാണെന്നും ജനങ്ങൾ പരിഭ്രാന്തരാകേണ്ടതില്ലെന്നും അധികൃതർ വ്യക്തമാക്കി.ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും തെറ്റായ വിവരങ്ങൾ പ്രചരിപ്പിക്കരുതെന്നും യുഎഇ വാർത്താ ഏജൻസിയായ ‘വാം’ റിപ്പോർട്ട് ചെയ്തു.The post അബുദാബിയിൽ മിസൈൽ അവശിഷ്ടങ്ങൾ പതിച്ച് മൂന്ന് സ്ഥലങ്ങളിൽ തീപിടുത്തം; അഞ്ച് ഇന്ത്യക്കാരടക്കം ആറ് പേർക്ക് പരിക്ക് appeared first on Arabian Malayali.