𝐂𝐀𝐁𝐈𝐈𝐍𝐒𝐀 𝐒𝐈𝐑𝐍𝐀𝐀: 𝐂𝐀𝐁𝐈𝐈𝐍𝐒𝐀 𝐋𝐀𝐅𝐄𝐄 𝐃𝐔𝐆𝐃𝐀𝐀..

Wait 5 sec.

𝗧𝗮𝗿𝗸𝗮𝗮𝗻𝗳𝗶𝗶 𝗗𝘂𝘂𝗿𝘀𝗼𝗼: 𝗦𝗲𝗲𝗻𝗮𝗮 𝗞𝘂𝗳𝗮𝗮𝘁𝗶𝗶𝗳 𝗕𝗲𝗲𝗸𝗮𝗺𝘁𝗶𝗶 𝗞𝗲𝗻𝗻𝘂𝘂Dhimmi jijjiiramaa, mootummootafi dhaloottan dhufaa darbaniif dhaadannoo ijoo barootaa ture. Haata’u malee, yaaliiwwan jijjiiramaa barootaaf taasifaman fuulduratti nuqaarisuu hindandeenye. Galmi kun abjuu guyyaa keessaa ta’ee hafuun, misooma hawaas-dinagdeefi ijaarsa sirna siyaasaatiin addunyaa biraa akka mujujnee hafnu ta’eera. Haalli asirraa ka’ee umames, gaaffilee ummata keenyaa barootaaf kuufaman deebisuuf, akkasumas dantaa isaa idil-addunyaatti kabachiisuuf kan nudandeessisuu miti.Sakaallaan kun sababoota garagaraatiin dabaalamuun ittuu gabaabbataa dhufee asgaheera. Sababoota kanniin keessaa isaan bu’uuraa lama addatti yoofudhanne: inni duraa, daandiiwwan rakkoolee keenya furuuf filataman irra caalaan isaanii hanqinaalee qabaachuu isaaniiti. Daandiiwwan kunniin gosoota rakkoolee keenyaa kan hinhubanne qofa osoo hintaane kalaqaan kan hinmasakamne turan. Lammata, rakkooleen kunniin qananii yeroo kan hinkennine ta’uu osoo hinhubatin hafuun keenya, imalli furmaataaf taasisaa turre imala qocaa akka ta’u gochuu isaati. Kanarraa kan ka’e, fooyya’iinsi galmeessinefi sonni daballe rakkoolee numudata turan waliin kan wal hinsimne turan.Rakkoon keenya addunyaan jijjiiramaafi guddinaan fagootti nudhiisee qaari’uu qofaa miti; naannawa ariitiin jijjiiramaa jiru keessatti deebiin nuti kenninu harkifataa ta’uu isaati. Daandiin nuti hordofne, kan rakkooleen keenya irra turan irraa kan fagaate, ariitiin nuti ittiin imalle sadarkaa rakkooleen keenya itti tuulamaa turanirra qususaa ture.Yaadamni Ida’amuu, seenaa kufaatii kanaaf beekamtii kennuun, ka’umsa tarkaanfii ce’uumsaati jedhee amana. Dhugaa hadhaawaa kana dheessun guuchii morma ishee cirracha keessa awwaaluun balaa miliquuf yaaltuun (ostrich effect) adda miti. Ce’uumsi tarsiima’aa haala qabatamaa ofii fudhachuu irraa jalqaba. Fakkeenyaaf, toorawwan xiyyeeffannoo mootummaa keenyaa: qonna, magaalomsuu, indastiroomsuu, misooma turizimiifi dinagdee dijitaalatiin eegee addunyaa ta’uu keenya fudhachuun ukukkubnee turuurra daandii qajeeladha.𝐁𝐢𝐫𝐪𝐚𝐛𝐚: 𝐇𝐚𝐚𝐥𝐚 𝐐𝐚𝐛𝐚𝐭𝐚𝐦𝐚𝐚 𝐓𝐨𝐨𝐫𝐚𝐰𝐰𝐚𝐧 𝐗𝐢𝐲𝐲𝐞𝐞𝐟𝐟𝐚𝐧𝐧𝐨𝐨 𝐊𝐞𝐞𝐧𝐲𝐚𝐚:𝐐𝐎𝐍𝐍𝐀: Addunyaan qonna gateettii qotiyyoorraa kan buuse jaarraalee lamaafi walakkaa dura warraaqsa indastiraalaa gulantaa duraatini. Inumaayyuu dhiibbaa olaanaa qonna irratti uumeen “warraaqsa mekaanaayizeeshinii” jechuun waamama. Har’a qonni ammayyaa safarrii-muraa (precision agriculture) keessa galuun gulantaa birootti ce’aa jira.Nubiratti qonni har’as gateettii qotiyyoofi humna namarraa bu’uu hindandeenye; omishtummaadhanis jeejee oolchurra kan taru miti. Qonnaan bulaan keenya biyyee gabbataa, bishaan bonaaf ganna yaa’u, duudhaa hojii cimaafi argama tarsiima’aa qabaatus hiyyummaa dhuma hinqabneefi jireenya harkaa-gara-afaanii keessatti akka hidhamu ta’eera. Dameen qonnaa sirnakkoo dinagdee ammayyaarraa waan dhiibameef, gulantaan biraa haahafuu, dhiyeessaa galtee dheedhiillee ta’uuf reeqqisaa jira.Dameen qonna xiyyeeffannoo dursoo mootummoota dhufaa darbanii ta’ee sadarkaa kanatti boodatti yoohafe, dameeleen hafan sadarkaa maaliirra akka jiran raaguun rakkisaa hinta’u. Haata’u malee, dilbiin kanarratti qabnu adeemsicha jijjiiruu akka dandeenyu nutti hima; carraan qonna keenya kallattiin gara teknoolojiitti utaalchisuuf (leapfrog) qabnu baldhaafi haaraadha.𝐌𝐀𝐆𝐀𝐀𝐋𝐎𝐌𝐒𝐔𝐔: Imalli magaalomsuu idil-addunyaa hedduu tarkaanfateera. Har’aan tana walakkaan ummata addunyaa magaalaa jiraata. Biyyoonni lakkoofsan xiqqaa hintaane ammoo ummata magaalaa jiraatu %80 hanga dhibbentaa 100’tiin gahaniiru. Hundumtaa omisha addunyaa (GDP) keessaa %80 magaalota irraa kan madduudha.Nubiratti ilaalamni magaalota akka motora dinagdeetti fudhatuyyuu goonkumaa hinturre; reefu dhalachaa jira. Hammantaan magaalomsuu (urbanization rate) naannoo keenyaa %20 hincaalu. Lakkoofsi kun giddugaleessa biyyaatii (national average) gadi. Kana malees, jiraataan magaalaa walakkaatti dhiyaatu kallattiin hojii qonnaa mala aadatiin gaggeeffamu irratti kan bobba’e. Kun ammoo hoji-manee guddaan fuuldura keenya jiraachuu nuhubachiisa.𝐈𝐍𝐃𝐀𝐒𝐓𝐈𝐑𝐈𝐈: Biyyi keenya warraaqsaalee indastiraalaa addunyaa irraatti gaggeeffamaan irraa fagoo turte. Yaaliiwwan darbee darbee indastirii babaldhisuuf taasifamanis, yaadama sirriin bu’uuruu dhabuun milkaa’uu hindandeenye. Adeemsi kun biyyi keenya kiyyoo hariiroo waljijjiirraa loogaa (unequal exchange) keessatti akka kuftu taasiseera. Omisha qonnaa dheedhii gatii rakasaan alatti ergitee, omisha warshaalome gatii qaaliin bituuf dirqisiisera. Kunis biyya daldala luucca’aa (trade imbalance) keessa galchuun rakkoo sharafa alaa keessa akka turtu taasiseera.Akkasumas, indastiriin keenya humna omishaa baadiyyaafi qabeenya umamaa keenya waliin hidhata omishaa amansiisaa (production linkage) uumuu hindandeenye. Kunammoo, dargaggoonni keenya carraa hojii akka dhaban, eebbi dilbii keenyarraa argamu akka qisaasa’u, darbees dinagdeen keenya akka hirkataa ta’u taasiseera.𝐓𝐔𝐑𝐈𝐙𝐈𝐌𝐈𝐈: Addunyaa har’aa keessatti turizimiin utubaa badhaadhina dinagdee ta’eera. Biyyoonni hedduun horata qaban kamuu gara hawwata turizimiitti jijjiiruu danda’aniiru. Hundumtaa omisha addunyaa keessaa gaheen turizimii %10 (gara USD Tiriiliyoona 10’tti dhiyaatu) ta’a. Dabalataanis namoota mil. 400’tti dhiyaataniif carraa hojii uumera. Lakkoofsi lachuu ariitiin dabalaa adeemuu barteen jiru ni’agarsiisa.Biyya keenyatti, misoomni turizimii waggoota hedduuf maqaa qofa qabatee akka turu ta’eera. Dilbii olaanaa gama qabeenya umamaa, dhaala seenaafi horata aadaatiin qabnu ittiin dhaadachuurra dabarree dinagdeetti hinjijjiirre. Haala qilleensaa mijatoo, teessuma lafaa hawwatoo, lub-daneessummaa olaanaa, hambaalee kiliyaafi miti-kiliyaa nam-tolchee dinqisiisoo qabnu tajaajila baramaafi waqtii muraasa qofaaf gabeessaa turre. Kanarraa kan ka’e, ummanni naannawaa, keessumaa dargaggoonni, qoteefi horsiisee bultoonni dilbii kanarraa fayyadamoo hintaane. Dabalataanis damichi gombisaa dinagdee waliigalaa keessatti gahee bahachuu qabu akka hinbahane ta’eera.𝐃𝐈𝐍𝐀𝐆𝐃𝐄𝐄 𝐃𝐈𝐉𝐈𝐓𝐀𝐀𝐋𝐀𝐀: Warraaqsi indastiraalaa afreesson ittifayyadama ragaa gurguddaa (Big Data), toorarroomsa (IoT)’fi dijitaalomsa babaldhisuun fooyya’iinsa sirna bulchiinsaa, hojmaataafi qulqullina jireenyaa dhugoomsera. Warraaqsi kun har’a gulantaa shanaffaa keessa galeera. Gulantaan kun hubannoo namtolchee (AI) irratti xiyyeeffatee saffisa hintilmaamamneen tarkaanfataa jira. Biyyoonni heddu qophaa’ummaa imaammataafi bu’uuraalee misoomaa qaban ariitiin gara kanatti duufaa jiru.Biyyi keenya gama kanaaniis imala milkaa’aa hintaasifne. Har’as sirna bulchiinsaa harkifataafi iftoomina hinqabne, hojmaata xaxamaafi danqaa keessaa hinbaane. Bu’uuraalee misooma dijiitaalaa dadhaboon, imammanni iftoomina hinqabne, dhaabbileen quucaroofi gufuuwwan biroo biyyi keenya gama kanaan akka hindammaqne taasisaniiru. Kunis hanniifi loogiin tajaajila mootummaa keessatti akka hidda gadifageeffatu, dargaggoonni keenya hanqina hubannoo teknoolojiirraa kan ka’e carraalee hojii idil-addunyaarraa akka adda citan taasiseera. Sirni dinagdee keenya al-idileefi dorgomummaa kan hinqabne akka ta’ufi imalli misooma ittifufaa akka gatatu ta’ee jira.Rakkooleen gurguddoon toorawwan xiyyeeffannoo shanan keessatti numudatan kunniin, ofii isaaniitti dhukkuba bu’uuraa osoo hintaane, mallattoo dhukkubichaati. Maddi dhukkubichaa inni guddaan eessa jira? Maaliif maraammartoo kana keessa deddebine?𝐊𝐚’𝐮𝐮𝐦𝐬𝐚 𝐁𝐮’𝐮𝐮𝐫𝐚𝐚: 𝐂𝐚𝐛𝐢𝐢𝐧𝐬𝐚 𝐒𝐢𝐫𝐧𝐚𝐚Yaadamni Ida’amuu, imalli jijjiiramaaf taasifnu, rakkoo numuudate akkasumas maddaafi umama (anatomy) isaa gadifageenyaan qorachuu irraa jalqabuu qaba jedhee amana. Bu’uuruma kanaan rakkoon numuudate 𝑪𝑨𝑩𝑰𝑰𝑵𝑺𝑨 𝑺𝑰𝑹𝑵𝑨𝑨 ta’uu kaa’a. Cabiinsi sirnaa 𝙃𝙐𝘿𝙃𝘼𝘼𝙇𝙀𝙀 𝘾𝘼𝘼𝙎𝘼𝙒𝘼𝘼 (structural and superstructural constraints) baroota hedduuf kuufaman irraa kan maddeedha. Kunis biyya keenya cabiinsa sirna siyaasaa, dinagdeefi hawaasummaa bar-dhibbeewwaniif hidda gadifageeffataniif saaxileera.Akkuma armaan olitti kaa’uuf yaalame, dogoggoroota dhukkuba biyya keenyaa hammeessan keessaa tokko gosaafi sadarkaa irra jiru hubachuu dhabuudha. Akkasumas qoricha haara galfii yeroo kennuun (pain killer) damdamachuuf yaaludha. Dhiibbaan hudhaalee caasawaa akka bubbee yeroof dhukkee kaasee darbuu, salphaatti kan maqfamuu miti. Adeemsa seenaa, ijaarsa dhaabbilee adamsoo (predatory) akkasumas sirna siyaas-dinagdee akka feeteen lafa qabateera.Dhiibban isaas baraa baratti kan bargaafate. Sochii (performance), bu’a qabeessummaafi misooma yeroo dheeraa guutumatti danqeera. Walsima dhabuun (misalignment) bu’uura dinagdeefi caasaa olaanaa (sirna siyaasaafi dhaabbilee) gidduutti uume, ijaarsa caasaa (architecture) mootummaafi hawaasaa keenya daran miidhera.𝐂𝐀𝐁𝐈𝐈𝐍𝐒𝐀 𝐒𝐈𝐑𝐍𝐀 𝐒𝐈𝐘𝐀𝐀𝐒𝐀𝐀Cabiinsi sirnaa siyaasa biyya keenyaa bu’uuraan hanqinoota sirna bulchiinsaa, adeemsafi hirmaachisummaa imaammataa, akkasumas qoodiinsa aangoo keessatti baroota dheeraaf kuufamaa turan irraa madda. Adeemsi kun aangoo mootummaa harka namoota dhuunfaatti kuusuun, dhaabbilee ta’e jedhamee akka dadhaban taasisuun, akkasumas mirga hawaasaafi duudhaalee dimokraasii laaffisuun kan of-ibsaa ture.Yeroo dhihoollee, sirnumti federaalizimii danummaa biyya keenyaa akka hammatu yaadamee hojiirra oole, walmorkii eenyummaafi walballeessuutti (zero-sum) jijjiiramee ture. Gama kanaan, naannoo keenya addatti yoofudhanne, osoo harkisa dinagdee, hawaasummaafi ummata biyya keenya ta’ee jiruu, moggeeffama siyaasaa, gatata ijaarsa sirnaafi laafina dhaabbilee baachuuf dirqamee ture.Walumaagalatti, seenaa biyyummaa jaarraalee hedduu qabaannus, cabiinsa sirna siyaasaa hudhaalee caasawaatiin muudate, dhaabbilee dadhaboo, sirna bulchiinsaa reeqqisoo, qoodiinsa aangoofi qabeenyaa loogaa, darbees duudhaalee demokraasii hongaa’atti nuhambiseera. Kana malees, amanamummaan ummanni mootummaa irratti qabu akka laafu, murteewwan bu’a qabeeyyin akka hindabarre, akkasumas biyyi akka hintasgabboofnefi muldhata waloo akka hinrimoofne taasiseera.𝐂𝐀𝐁𝐈𝐈𝐍𝐒𝐀 𝐒𝐈𝐑𝐍𝐀 𝐃𝐈𝐍𝐀𝐆𝐃𝐄𝐄:Gufuuleen caasawaa sirna dinagdee keenya gahumsa waliigalaafi fulla’iinsa guddinaa dhorkaa turaniidha. Dabalataanis bu’a qabeessummaa imaammata dinagdee yeroo gabaabaa hojiirra oolaa turanittis gufuu ta’anii turaniiru. Sirni dinagdee keenya gos-tokkeefi harka mootummaatti akka kuufamu taasiseera. Kunis qaawwa hammattoo to’annoofi laamsha’a dhaabbilee waan hordofsiisef sochii waliigalaa dinagdee mudhukseera. Akkasumas guddina damee dhuunfaa, dhaweessummaa keessoo, invastimantii alaafi keessoo hudhuun ukkaamsera.Kana malees, hanqina tajaajila hawaasummaa, yeroon ala ta’uu bu’uuraalee misoomaafi dhiyeessii buraajoo (utilities), akkasumas rincicummaan gabaa humnaa (rigid labor market) waan hordofsiiseef, milkaa’ina sochii dinagdee fulla’iinsa qabuuf gufuu hamaa ta’eera. Imaammata maallaqaa (monetary policy)’fi imaammata galiifi baasii mootummaa (fiscal policy) raasuun, tasgabbii dinagdee gooroo (ba’aa liqaafi hanqina sharafa alaa) jeeqera.Hammeenyi hundaa’olii ammoo, idaan adeemsa kanaan umame qoteefi horsiisee bultoota, dargaggootafi dafqee bultoota keenyarratti fe’amuu isaati. Qoteefi horsiisee bultoonni keenya bara dhufaa darbu hunda jijjiirama qilleensaa, duguugama gabbina biyyeefi hanqina gabaa ammayyaatiin akka rimmiidhaman darbees akka moggeeffaman taasiseera. Dargaggoonni qaxaleen keenya, dinagdee isaan simachuu danda’u dhabuun, fedhiifi abdii waliin eebbifaman akka dhaban taasiseera. Ba’aan idaa biyyaa, ummata keenya hojjetee buluu darbees dhaloota irratti akka fe’amu taasiseera.𝐂𝐀𝐁𝐈𝐈𝐍𝐒𝐀 𝐒𝐈𝐑𝐍𝐀 𝐇𝐀𝐖𝐀𝐀𝐒𝐔𝐌𝐌𝐀𝐀:Cabiinsi sirnaa hawaasummaa, hudhaalee caasawaa diraa hawaasa (fabric of society) keenyaa keessa galaniin kan muudatedha. Kunis akkaataa ittijiraatu, walitti dhufu, carraa garagaraa ittargatuufi ittifayyadamu irratti dhiibbaa hamaa taasiseera. Cabiinsi kun haqa qabeessummaa carraalee/facaatii guddina kaappitaala namaa — barnootaa, fayyaa akkasumas bu’uuraalee misoomaa dhorkeera; akkasumas hiyyummaa ittifufsiisuun dhaloota dhidhimseera.Walqixxummaan caasawaa, haqa hawaasummaafi wabiim nyaataa akka hinmirkanoofne, buqqa’iinsifi rakkoon namoomaa (humanitarian crisis) akka ittifufan, hoji dhabdummaafi qormaatileen naannawaa akka hammaatan taasiseera.Yaadamni Ida’amuu jaldhina caasawaa (structural deformities) cabiinsa sirnaa hordofsiise kana adda baasuu qofa osoo hintaane, tarsiimoolee ittiin diignee ijaarullee qopheessera. Galmi hundeeffama Mootummaa Ida’amuus amaloota tarsiimolee kanniin hojiirra oolchuuf nama dandeessisan irra dhaabbachuun maraamartoo kana cabsuu, darbees badhaadhina hundagaleessa dhugoomsuudha.𝑬𝒈𝒂𝒂, cabiinsa sirnaa hidda gadifageeffate kana, suphaa yerootiin yaaluun hindanda’amu. Cabiinsi bu’uuraa, waldhaansa bu’uuraa (radical intervention) gaafata. Qaxxisa baramaadhan maraamartoo furguuga hamaa keessa gale dhaabuun waan yaadamuu miti. Kanarraa kan ka’e, gaaffiin “𝗺𝗮𝗿𝗮𝗮𝗺𝗮𝗿𝘁𝗼𝗼 𝗸𝗮𝗻𝗮 𝗰𝗮𝗯𝘀𝗶𝗻𝗲𝗲 𝗯𝗮𝗵𝘂𝘂𝗻 𝗶𝗺𝗮𝗹𝗮 𝘂𝘁𝗮𝗮𝗹𝗰𝗵𝗼𝗼 𝗸𝗲𝗲𝘀𝘀𝗮 𝗴𝗮𝗹𝘂𝘂𝗳 𝗻𝗶𝗱𝗮𝗻𝗱𝗲𝗲𝗻𝘆𝗮𝗮?” jedhu deebii sirrii nurraa eegaa jira.Mootummaan Ida’amuu, 𝑻𝒂𝒓𝒔𝒊𝒊𝒎𝒐𝒐 𝑪𝒆’𝒖𝒎𝒔𝒂𝒂 niqabaa? Kutaa ittaanuun kan ilaallu ta’a.