గత కొంతకాలంగా కాంగ్రెస్ రాష్ట్ర నాయకత్వంపై తీవ్ర అసంతృప్తితో ఉన్న జీవన్‌ రెడ్డి చెప్పినట్లుగానే పార్టీకి రాజీనామా చేశారు. ఈ మేరకు అనుచరుల సమక్షంలో లేఖ విడుదల చేశారు. తననే నమ్ముకున్న కార్యకర్తల హక్కులను కాపాడలేకపోతున్నానని అందుకే ఇన్నేళ్లు కొనసాగిన కాంగ్రెస్ పార్టీకి రాజీనామా చేస్తున్నట్లు ప్రకటించారు. తనకు తోడుగా నిలిచిన కాంగ్రెస్ కార్యకర్త, మాజీ ఎంపీటీసీ మారు గంగారెడ్డిని నడిబజారులో కిరాతకంగా చంపారని.. కార్యకర్త బలైతే సంయమనం పాటించమంటారా? అని ప్రశ్నించారు. కార్యకర్త దారుణ హత్యకు గురైతే ఎవరూ స్పందించలేదని ఆవేదన వ్యక్తం చేశారు. తనకు తోడుగా నిలిచిన నాయకుడు చనిపోతే సీఎం రేవంత్ కనీస పరామర్శకు రాలేదన్నారు. బాధిత కుటుంబాన్ని ఆదుకుందామనే భరోసా కల్పించలేదన్నారు. తాను శాసనమండలి సభ్యుడిగా.. రోడ్డు ఎక్కాల్సిన పరిస్థితి వచ్చిందన్నారు. ఇన్నేళ్లు పార్టీకి సేవ చేస్తే.. తనకు తీరని అవమానం జరిగిందని అందుకే పార్టీకి రాజీనామా చేస్తున్నట్లు జీవన్ రెడ్డి ప్రకటించారు. కాగా, 2023 అసెంబ్లీ ఎన్నికల్లో జగిత్యాల కాంగ్రెస్ అభ్యర్థిగా పోటీ చేసిన జీవన్ రెడ్డి బీఆర్ఎస్ పార్టీ నుంచి పోటీ చేసిన సంజయ్ చేతిలో ఓటమి పాలయ్యారు. ఆ తర్వాత సంజయ్ కాంగ్రెస్ పార్టీకి దగ్గరవగా.. తన ప్రత్యర్థిని పార్టీలో ఎలా చేర్చుకుంటారని జీవన్ రెడ్డి అసంతృప్తి వ్యక్తం చేశారు. ఆ తర్వాత తన ప్రధాన అనుచరుడు గంగారెడ్డి హత్యకు గురి కాగా.. సంజయ్ వర్గమే కారణమని జీవన్ రెడ్డి ఆరోపించారు. అప్పట్నుంచి పార్టీకి అంటీ ముట్టనట్లుగా వ్యవహరిస్తున్నారు. మున్సిపల్ ఎన్నికల్లోనూ సంజయ్ వర్గానికే కాంగ్రెస్ టికెట్లు కేటాయించటంతో జీవన్ రెడ్డి మరింత అసహనానికి, ఆవేదనకు గురయ్యారు. ఇక పార్టీని వీడక తప్పదని గత కొన్ని రోజులుగా చెబుతూ వచ్చారు. ఈ నేపథ్యంలోనే ఇటీవల మంత్రులు అడ్లూరి లక్ష్మణ్, శ్రీధర్ బాబు, పీసీసీ చీఫ్ మహేష్ కుమార్ గౌడ్‌తో పాటు పలువురు కీలక నేతలు బుజ్జగించే ప్రయత్నం చేసినా ఆయన వెనక్కి తగ్గలేదు. తాజాగా కాంగ్రెస్ పార్టీకి రాజీనామా చేస్తూ కార్యకర్తల సమక్షంలో లేఖ విడుదల చేశారు. ఏ పార్టీలో చేరబోతున్నారు..?కాంగ్రెస్ పార్టీకి రాజీనామా చేసిన జీవన్ రెడ్డి ఏ పార్టీలో చేరబోతున్నారనే అంశం ప్రస్తుతం హాట్ టాఫిక్‌గా మారింది. విశ్వసనీయవర్గాల సమాచారం మేరకు ఆయన బీఆర్ఎస్ పార్టీలో చేరనున్నట్లు తెలుస్తోంది. జగిత్యాల నియోజకవర్గంలో బీఆర్ఎస్ బలంగానే ఉంది. గత రెండు పర్యాయాలు కూడా ఆ పార్టీ నుంచి పోటీ చేసిన సంజయ్ ఎమ్మెల్యేగా విజయం సాధించారు. దీనికి తోడు సంజయ్ కాంగ్రెస్ పార్టీకి దగ్గర కావటంతో ప్రస్తుతం బీఆర్ఎస్ పార్టీకి నాయకత్వ లోటు ఉంది. ఈ నేపథ్యంలో ఆయన బీఆర్ఎస్ పార్టీలో చేరనున్నారనే వార్తలు వినిపిస్తున్నాయి. బీజేపీ నుంచి కూడా ఆఫర్ ఉన్నా.. అటువైపు వెళ్లకపోవచ్చునని రాజకీయ విశ్లేషకులు భావిస్తున్నారు. అయితే రాజీనామా తర్వాత నియోజకవర్గ ప్రజలను కలుస్తానని జీవన్‌ రెడ్డి మంగళవారం నాటి సమావేశంలో వెల్లడించారు. ఇన్నాళ్లు కలిసి ఉండి వీడిపోవటం బాధకరంగా ఉందని అన్నారు. తదుపరి భవిష్యత్‌ నిర్ణయం ఎలా ఉంటుందో తనకు తెలియదని.. కర్మసిద్ధాంతం ఎటువైపు తీసుకెళుతుందో వేచి చూడాలని అన్నారు.