Silver Price: కొన్ని నెలల క్రితం వెండి ధరలు రికార్డ్ స్థాయిలకు చేరుకున్నాయి. 2025లో 170 శాతం మేర ధర పెరగడంతో టాప్ పర్ఫార్మింగ్ అసెట్‌గా వెండి నిలిచింది. ఆ తర్వాత 2026, జనవరి నెలలోనే 74 శాతం మేర ధర పెరిగి ఆల్ టైమ్ హై స్థాయిని తాకింది. దీంతో ఇన్వెస్టర్లకు భారీ లాభాలు వచ్చాయి. కానీ, చాలా తక్కువ సమయంలోనే పరిస్థితులు తారుమారయ్యాయి. వెండి ధరలు ఉన్నఫలంగా కుప్పకూలాయి. లాంగ్ టర్మ్, షార్ట్ టర్మ్ ఇన్వెస్టర్లు ఇద్దరికీ భారీ నష్టాలు మిగిల్చింది. మార్కెట్లో ఇటీవలి కాలంలో అతిపెద్ద క్రాష్ గా పరిగణిస్తున్నారు. ఇది కేవలం స్వల్ప కాలిక సర్దుబాటు మాత్రమే కాదని, మార్కెట్ సెంటి‌మెంట్‌లో వచ్చిన బలమైన మార్పుగా విశ్లేషకులు భావిస్తున్నారు. ఈ పరిస్థితిని నిపుణులు ఫాలింగ్ నైఫ్ (Falling Knife)తో పోలిస్తున్నారు. అంటే వేగంగా పడిపోతున్న కత్తిని పట్టుకునేందుకు ప్రయత్నిస్తే చేతులు తెగే ప్రమాదం ఉన్నట్లే, నిరంతరాయంగా పడిపోతున్న వెండిని ఇప్పుడే కొనడం వల్ల మరింత నష్టపోయే అవకాశం ఉందని హెచ్చరిస్తున్నారు. మార్కెట్ ఎక్కడ స్థిరపడుతుందో స్పష్టత వచ్చే వరకు వేచి చూడడం ఉత్తమమని సూచిస్తున్నారు. అంతర్జాతీయంగా పారిశ్రామిక డిమాండ్ తగ్గడం, ఆర్థిక సమీకరణాలు మారడంతో వెండి ధరలపై ప్రతికూల ప్రభావాన్ని చూపిస్తున్నట్లు చెబుతున్నారు. వెండిని ఆభరణంగానే కాకుండా పారిశ్రామిక లోహంగా చూస్తారు. కాబట్టి ప్రపంచ ఆర్థిక మందగమన సూచనలు దీనిపై ఒత్తిడిని పెంచాయంటున్నారు. 51 శాతం పతనంభారతీయ కమోడిటీ మార్కెట్లో వెండి ధరలు ఊహించని విధంగా పడిపోయాయి. గత ఏడాది 170 శాతం లాభాలను పంచి, 2026 జనవరిలోనూ మరో 74 శాతం పెరిగిన వెండి ఇప్పుడు తన రికార్డ్ గరిష్ఠాల నుంచి ఏకంగా 51 శాతం పతనమైంది. కేవలం రెండు నెలల వ్యవధిలోనే కిలో వెండి రేటు రూ.2.24 లక్షల మేర పడిపోవడం గమనార్హం. రికార్డ్ స్థాయిలో పెరిగి ఇప్పుడు ఒక్కసారిగా పతనం కావడంతో ఇన్వెస్టర్లు తీవ్ర ఆందోళనకు గురవుతున్నారు. కానీ ప్రస్తుత ధర ఎంసీఎక్స్ మార్కెట్లో సగానికి పడిపోయింది. మే 2026 నాటి వెండి ఫ్యూచర్స్ 4.3 శాతం తగ్గి కిలోకు రూ.2.15 లక్షల వద్ద ట్రేడవుతోంది. గరిష్ఠ స్థాయుల నుంచి చూస్తే రూ.2.24 లక్షల భారీ తగ్గుదల నమోదు చేసింది. ఈ ఏడాది 2026 ఆరంభంలో భారీ లాభాల్లో ఉన్న వెండి ప్రస్తుతం ఏడాది ప్రాతిపదికన చూస్తే 4 శాతం నష్టాల్లోకి వెళ్లింది. కారణాలు ఇవేఅమెరికా డాలర్ ఇండెక్స్ 97 స్థాయి నుంచి 100.15 స్థాయికి పెరగడంతో వెండిపై ఒత్తిడి పెరిగినట్లు విశ్లేషకులు చెబుతున్నారు. డాలర్ బలపడితే సాధారణంగా బంగారం, వెండి ధరలు తగ్గుతాయి. గత ఏడాది నుంచి వచ్చిన భారీ లాభాలను నగదు రూపంలోకి మార్చుకునేందుకు ఇన్వెస్టర్లు ఒక్కసారిగా విక్రయాలకు పాల్పడడమూ ఈ పతనానికి ప్రధాన కారణంగా చెప్పవచ్చు. అలాగే వెండి వినియోగంలో 60 శాతానిపైగా వాటా గల చైనాలో పారిశ్రామిక కార్యకలాపాలు నెమ్మదించడం డిమాండ్‌ను తగ్గించింది. సోలార్ ప్యానెల్ తయారీదారులు వెండికి ప్రత్యామ్నాయాల వైపు చూడడమూ ధరలపై ప్రభావం చూపినట్లు తెలుస్తోంది.