ప్రేమలో కొన్ని ఎక్స్‌పీరియన్స్ చేస్తేనే కానీ అందులోని గాఢత అర్థం కాదు. ఎన్నో ఫీలింగ్స్ ఉన్నా కూడా.. మాటల్లో వివరించలేక మనోవేదన అనుభవించే ప్రేమకథలెన్నో. ప్రాణంగా ప్రేమించిన ప్రతి ప్రేమికురాలు నిలదీసి అడగలేని ప్రశ్నలు కొన్ని మిగిలిపోతుంటాయి. అలా అడగలేని ప్రశ్నలు, చెప్పలేని ఫీలింగ్స్‌కి సమాధానం ‘ది గర్ల్ ఫ్రెండ్’ మూవీ. టాక్సిక్ రిలేషన్‌షిప్‌లో చిక్కుకుని దాన్నుంచి బయటపడలేక నలిగిపోయిన భూమాదేవి కథే ‘ది గర్ల్ ఫ్రెండ్’. తనని తానుగా స్వీకరించని బంధం నుంచి.. ఆ బంధీఖానా నుంచి ఆ యువతి ఎలా బయటపడిందనేదే ‘ది గర్ల్ ఫ్రెండ్’ కథాంశం. ఈ సినిమా కథ విన్న తరువాత రష్మిక.. రెమ్యూనరేషన్ గురించి మాట్లాడకుండానే ఓకే చెప్పింది. అంతే కాదు.. ‘ఇలాంటి కథ ఆడియెన్స్‌కు చెప్పాలి.. ఒక అమ్మాయిగా నేను ఈ కథకు చాలా కనెక్ట్ అయ్యాను.. బయట ఉన్న అమ్మాయిలు అందరికీ నేను ఇచ్చే బిగ్ హగ్ ఈ సినిమా’ అని చెప్పడమే కాదు.. ఆ మాటని నిలబెట్టుకుంది రష్మిక. భూమాదేవి (రష్మిక).. పురుడుపోసుకోగానే తల్లిని పోగొట్టుకున్నందుకు ఆమెకి ఆ పేరు. తల్లిలేని బిడ్డ కావడంతో గారాబంగా పెంచుతాడు తండ్రి రావు రమేష్. థియేటర్ ఆర్ట్స్, లిటరేచర్‌పై ఉన్న మక్కువతో రామలింగయ్య ఆర్ట్స్ అండ్ సైన్స్ కాలేజీ ఎంఏ లిటరేచర్ జాయిన్ అవుతుంది భూమాదేవి. చదువు తప్ప వేరే ధ్యాస లేని భూమాదేవి.. అనూహ్య పరిస్థితుల్లో అదే కాలేజ్‌లో చదివే విక్రమ్ (దీక్షిత్ శెట్టి) కంటపడుతుంది. తొలిచూపులోనే భూమాని ఇష్టపడతాడు విక్రమ్. భూమా ఇష్టపడాల్సి వస్తుంది. ఒక ముద్దుతో మొదలైన వారి ప్రేమ.. హద్దులు దాటేసరికి విక్రమ్‌లోని జెలసీ భూమాదేవి స్వేచ్ఛను హరించే స్థాయికి చేరుకుంటుంది. అతనిలోని అహంకారం, అనుమానం, హింసాత్మక ప్రవర్తన నుంచి బయటపడటానికి భూమాదేవి పడిన సంఘర్షణే మిగిలిన కథ. చి.ల.సౌ, మన్మథుడు 2 చిత్రాలతో అభిరుచి గల దర్శకుడనిపించుకున్న రాహుల్ రవీంద్రన్.. ప్రేమకథల్లో ఓ కొత్త కోణం చూపించారు ‘ది గర్ల్ ఫ్రెండ్’ చిత్రంతో. కాలేజ్ బ్యాక్ డ్రాప్‌లో సాగే ప్రేమ కథలో వుమెన్ సెంట్రిక్ అంశాన్ని జోడించి.. ప్రేక్షకులు ఈ కథకు రిలేట్ అయ్యేట్టు చేశారు. కథతో పాటు జర్నీ చేస్తూ.. ఆ కథలో తమని తాము చూసునేట్టు చేశారు. గర్ల్ ఫ్రెండ్ లేకున్నా.. తమకు తెలిసిన వారి ప్రేమ కథని గుర్తుకు చేసుకునేట్టుగా కథలోని పాత్రల్ని మలిచారు. ఇందులోని ప్రతి పాత్ర, ప్రతి సందర్భం మన లైఫ్‌లో జరిగిన వాటిలా అనిపిస్తాయి. ఇలాంటి ఇంటెన్స్ అండ్ ఎమోషనల్ లవ్ స్టోరీని చెప్పడం.. చెప్పి పాత్రల్ని ఒప్పించడం పెద్ద టాస్క్. ఎందుకంటే చెప్పడానికి ఏముంది ఇందులో అనేట్టుగా అనిపించే ఇలాంటి కథలోనే చాలా డెప్ట్ ఉంటుంది. అది తెరపై ఆవిష్కరింపబడినప్పుడే అందులో ఉన్న బ్యూటీ బయటపడుతుంది. ‘బదులు లేని ప్రశ్నలకు భయపడి నీ నుంచి నువ్వు పారిపోకు.. నువ్వు నచ్చినవాడి విన్నపాలనే కాదు.. నీ మనసు కోరుకునే విన్నపాలను విను’ అనే కోర్ ఎమోషన్‌ని ఆయా పాత్రలతో అద్భుతంగా పండించారు. తాను చెప్పే కథ.. ప్రతి ప్రేమికుడ్ని, ప్రేమికురాలిని వెంటాడేట్టు వెంబడించేట్టు చేశారు. ప్రతి ఫ్యామిలీలో ప్రతి పర్శన్ కథతో రిలేట్ అవుతారు. మనకి తెలిసినప్పటికీ పైకి చెప్పలేని కొన్ని నిజాలను ఈ సినిమాలో చూపించారు దర్శకుడు. ఓ అమ్మ.. ఓ కూతురు.. ఓ తండ్రి.. ఓ స్నేహితుడు.. ఈ చిత్రంలోని కథను ఈ క్యారెక్టర్లు నడిపిస్తాయి. పాత్రల చుట్టూ తిరిగే కథ కావడంతో ఎమోషనల్ కనెక్ట్ అవుతుంది. తెరపై కనిపించే సన్నివేశాలు రియాలిటీలో ఉన్నవే అయినా.. వాటిని మన రియల్ లైఫ్‌లో యాక్సెప్ట్ చేయలేం. అలాంటి సున్నిత అంశాలకు భావోద్వేగాలను జోడించి ఎమోషనల్‌గా కనెక్ట్ చేశారు రాహుల్ రవీంద్రన్. యూత్‌తో పాటు ఫ్యామిలీ ఆడియన్స్‌కి కనెక్ట్ అయ్యేలా.. వుమెన్ సెంట్రిక్ అంశాన్ని మగాళ్లకి కూడా కన్వెన్సింగ్‌గా చెప్పడంలో తన దర్శకత్వ ప్రతిభ చూపించారు రాహుల్. అలాగని సందేశాలు, నీతులు చెప్పకుండా.. నిర్ణయం మీదే అన్నట్టుగా సినిమా చూసే ఆడియెన్స్‌ ఆలోచించనకే వదిలిపెట్టేశారు. ఈరోజు కరెక్ట్ అయినది రేపు రాంగ్ అవ్వొచ్చనే ఆలోచనతో ఎవరికీ మెసేజ్‌లు ఇవ్వకుండా ఇంటెన్స్ ఎమోషన్ ఉన్న లవ్ స్టోరీని రియలిస్టిక్ అప్రోచ్‌లో ప్రజెంట్ చేశారు. రెగ్యులర్ కమర్షియల్ స్టోరీ కాకుండా.. ఓ కొత్త తరహా ప్రేమకథను చూపించారు రాహుల్ రవీంద్రన్. కథ, కథనం, మాటలు అతనే కావడంతో చాలా నీట్‌గా ప్రజెంట్ చేశారు. తాను రాసుకున్న కథకి బలమైన పాత్రల్ని ఎంచుకోవడంతో పాటు.. ఆ కథని ఎలా చెప్తే ఆడియన్స్‌కి కనెక్ట్ అవుతుందో దర్శకుడు లెక్క తప్పలేదు. ఈ సినిమాకి హీరోయిన్ క్యారెక్టరైజేషన్ ప్రధాన బలం. భుమాదేవి పాత్రలో రశ్మిక కనిపించదు.. భూమా అనే పాత్రనే కనిపిస్తుంది. అంతలా లీనమైంది రష్మిక. పుష్ప, పుష్ప 2, యానిమల్ ఇలా చాలా ఆమెకి హిట్లు ఇవ్వొచ్చు గాక.. ‘ది గర్ల్ ఫ్రెండ్’ చిత్రంలో నటిగా ఆమె మరో మెట్టు ఎక్కింది. ఆమె గత చిత్రాల్లో ఎక్స్‌పోజింగ్.. అదీ ఇదీ అంటూ చాలా కంప్లైంట్ చూశాం. కానీ ఈ సినిమాలో మాత్రం ఎలాంటి అశ్లీలత కానీ.. ఎక్స్‌పోజింగ్ గానీ చేయకుండా కేవలం తన నటనతోనే మెప్పించింది. పెద్ద సూట్ కేస్‌ని ఈడ్చుకుంటూ హాస్ట‌ల్‌లో అడుగుపెట్టింది మొదలు.. క్లైమాక్స్‌‌లో విజృంభించే సీన్ వరకూ ప్రతి ఫ్రేమ్‌లోనూ తానే కనిపిస్తూ.. కథకి కొండంత అండగా నిలిచింది రష్మిక. హాస్టల్‌లో ఉన్నప్పుడు ‘హాయ్ నాన్నా’ సినిమా డౌన్ లోడ్ పెట్టాను.. రా చూద్దాం అని హీరో అడిగినప్పుడు.. బయటకు వచ్చి.. మళ్లీ రెండు అడుగులు వెనక్కి వేసి.. మంచంపై ఉన్న చున్నీని కప్పుకుని వెళ్లే సీన్ ఆమె క్యారెక్టర్‌కి అద్దం పట్టేదిగా చూపించారు. ‘ది గర్ల్ ఫ్రెండ్’ లాంటి సినిమా కొన్నేళ్ల కిందట తాను చూసి ఉంటే తన జీవితం పట్ల దృక్పథం మరోలా ఉండేది అని చెప్పిందంటే ఈ పాత్రకి రష్మిక ఎంత ప్రేమించిందో అర్థం చేసుకోవచ్చు. అంత ఫీల్ అయ్యి చేసింది కాబట్టే.. ఆ పాత్ర అంత అద్భుతంగా పండింది. మన మధ్య జరిగింది నీ మీద నాకున్న నమ్మకంరా.. దాన్ని అందరికీ చెప్పుకుంటావ్ ఏంట్రా చెత్త నా కొడకా? అంటూ క్లైమాక్స్‌లో చెప్పే డైలాగ్‌లో ఆమెలోని వీరనారిని చూపించింది. తన బంధకాల్లో నుంచి బయటపడలేక నలిగిపోతున్నట్టుగా.. బాత్ రూం గోడలు దగ్గరకు వచ్చే సింబాలిక్ షాట్‌‌లో ఏడిపించేసింది రష్మిక. ఇక తండ్రీ కూతుళ్లు మధ్య వచ్చే సీన్‌లకి అయితే థియేటర్స్‌లో అరుపులే. ‘‘నీకు ఇంత ఆపుకోలేనంత ఇది ఉందని తెలిసి ఉంటే.. ఈ కాలేజ్ గీలేజ్ ఎందుకూ..? నీకు అప్పుడే పెళ్లి చేసేసేవాడ్ని కదా? ఎందుకే ఈ అబద్దాలన్నీ ఎందుకు? కాలేజ్‌కి వెళ్లాలి.. హాస్టల్‌కి వెళ్లాలీ.. ఎందుకీ డ్రామాలు? ఇంత క్యారెక్టర్ లెస్ కూతురు నాకెలా పుట్టిందిరా భగవంతుడా? నువ్వు కూడా మీ అమ్మతో పాటు చచ్చుంటే బాగుండేదే?’’ అని రావు రమేష్ చెప్పే డైలాగ్‌కి రీసౌండ్ మామూలుగా లేదు. ‘‘నువ్వు ఎవరికి భయపడుతున్నావో తెలియదు కానీ.. అలవాటు చేసుకోకు’’ అంటూ హీరోయిన్ పాత్రకి లోతైన మాటలు రాసి పెన్ పవర్ చూపించారు దర్శకుడు. ‘‘నా లైఫ్‌లో నాకేం కావాలో ఆలోచించుకోనియ్యి.. ఊపిరాడటం లేదు’ ’ అంటూ గుండెల పగిలేలా ఏడ్చే సీన్‌లో రష్మిక కళ్లు చెమ్మగిల్లేట్టు చేసింది. హీరో ఇంటికి వెళ్లి అతని తల్లిని చూసి రియలైజ్ అయ్యే సీన్‌లో ఒళ్లు జివ్వుమనేట్టు చేసింది రష్మిక. దసరా సినిమాతో తెలుగు ఆడియన్స్‌కి చేరువైన దీక్షిత్ శెట్టి.. ఈ సినిమాలో మల్టీ షేడ్స్ ఉన్న విలక్షణ పాత్రలో నటించాడు. హీరోయిన్ తండ్రి పాత్రలో కనిపించిన రావు రమేష్.. ‘ఆర్ఎక్స్ 100, కొత్త బంగారులోకం వంటి సినిమాల్లోను తన నటనను గుర్తు చేశారు. దుర్గగా అను ఇమ్మానుయేల్ మరో ఇంపార్టెంట్ రోల్ చేసింది. స్టైలిష్ అండ్ బోల్డ్ పాత్రలో మెప్పించడంతో పాటు.. కథానాయిక తన గమ్యం చేరడంలో సాయం అందించి కీలకంగా నిలిచింది. దర్శకుడిగానే కాకుండా.. ప్రొఫెసర్‌గానూ ఈ సినిమాలో కీలకమైన పాత్రలో కనిపించి మెప్పించారు రాహుల్ రవీంద్రన్. రోహిణి ఒకే ఒక్క సీన్‌లో కనిపిస్తుంది. ఒక్క డైలాగ్ కూడా లేకుండానే.. చూపు తిప్పుకోకుండా తనవైపే చూసేట్టుగా ఆ సీన్‌లో చింపేసింది రోహిణి. అసలు కథని మలుపుతిప్పేది.. హీరోయిన్‌లో రియలైజేషన్ వచ్చేది ఆ సీన్‌తోనే. అల్లు అరవింద్‌ని స్టార్ ప్రొడ్యూసర్ అని ఎందుకు అంటారో.. మంచి కథని ఎలా ఒడిసిపడతారనడానికి ఈ కథే ఉదాహరణ. ఆహా ఓటీటీ కోసం రాహుల్ రవీంద్రన్ రాసిన ఈ కథని.. ఇది ఓటీటీకి కాదు.. సినిమా చేద్దాం అంటూ ‘ది గర్ల్ ఫ్రెండ్’ కథ పట్టాలెక్కడంలో కీలకపాత్ర పోషించారాయన. ‘ఒక నిర్మాతగా కోట్లు సంపాదించాను.. కానీ ‘ది గర్ల్ ఫ్రెండ్’ ద్వారా డబ్బు కంటే సంతృప్తిని ఎక్కువ సంపాదించాను’ అని ముందే చెప్పిన అల్లు అరవింద్.. ఆయన సమర్పణలో ధీరజ్ మొగిలినేని, విద్య కొప్పినీడిలను నిర్మాతలుగా పెట్టారు. ఖర్చుకి వెనకాడకుండా మంచి ఔట్ పుట్‌ని అందించారు. ఈ సినిమాకి మరో మేజర్ హైలైట్ హేషమ్ అబ్దుల్ వహాబ్ అందించిన పాటలు. నాలుగు పాటలు, రెండు బిట్ సాంగ్స్ కథకి తగ్గట్టుగా భలే కుదిరాయి. కథని ముందుకు తీసుకెళ్తున్నట్టుగా ఉంటాయి ఈ పాటలన్నీ. హేషమ్ అబ్దుల్ వహాబ్ తెలుగులో ఒప్పుకున్న మొదటి సినిమా ఇదే. అయితే అంతకంటే ముందుగా ఖుషి, హాయ్ నాన్నలు రిలీజ్ అయ్యాయి. మనమే, 8 వసంతాలు వంటి చిత్రాలకు బ్యాగ్రౌండ్ అందించి మంచి పేరు సంపాదించిన హేషమ్ అబ్దుల్ వహాబ్ ఈ సినిమా బ్యాగ్రౌండ్ స్కోర్‌ని తన సహచరుడు ప్రశాంత్ విహారికి అప్పగించారు. ఇద్దరూ కలిసి ‘ది గర్ల్ ఫ్రెండ్‌’ మ్యూజికల్ హిట్‌ చేశారు. ఇలాంటి ఇంటెన్సిటీ లవ్ స్టోరీలకు సాంగ్స్, బీజీఎం ఆయువుపట్టు లాంటిది. కథలోని ఇంటెన్స్, ఎమోషన్‌ని క్యారీ చేస్తూ మంచి మ్యూజిక్ అందించారు. కృష్ణన్ వసంత్ సినిమాటోగ్రఫీ డీసెంట్‌గా ఉంది. కథ చాలా వరకూ కాలేజ్‌లోనే ఉంటుంది. అయినా లొకేషన్స్ బోరింగ్ అనిపించకుండా ప్రతి షాట్‌లోనూ జాగ్రత్త పడ్డారు. ఓవరాల్‌గా.. ‘ది గర్ల్ ఫ్రెండ్’ నచ్చేస్తుందబ్బా. భూమాదేవి ప్రేమికుల హృదయాలను కదిలిస్తుంది. ముఖ్యంగా అమ్మాయిల్ని ఆలోచనలో పడేస్తుంది.