మన దేశంలో ఎన్నో వింత ఆచారాలు, సంప్రదాయాలు ఉన్నాయి. కొన్ని ఆచారాల వెనుక సైన్స్ ఉండొచ్చు. మరికొన్నింటి వెనుక భక్తి, విశ్వాసం, లేదా ఒకనాటి భయం నిక్షిప్తమై ఉండొచ్చు. అలాంటి అసాధారణ ఆచారాలలో ఒకటి వికారాబాద్ జిల్లా దుద్యాల మండలం వాల్యానాయక్ తండాలో కనిపిస్తుంది. ఈ తండాలో ఒక విచిత్రమైన సంప్రదాయం కొనసాగుతోంది, అదేంటంటే ఈ తండాకు కోడలిగా వచ్చే ఏ మహిళ అయినా మానేయాలి.ఈ తండాలో సుమారు 400 మంది జనాభా ఉండగా.. వారిలో 80 మందికి పైగా కోడళ్లు ఉన్నారు. పెళ్లి చేసుకొని ఈ గ్రామంలో అడుగుపెట్టినప్పటి నుంచి వారికి మాంసాహారం పూర్తిగా నిషేధం. ఈ ఆచారం వెనుక ఒక శతాబ్దాల నాటి కథ దాగి ఉంది. వందల సంవత్సరాల క్రితం.. దేశాన్ని గడగడలాడించిన కలరా (గత్తర) వ్యాధి ఈ తండా సమీపంలోనూ విజృంభించింది. ఆ సమయంలో తండాకు చెందిన గ్రామపెద్దలు దేవతలుగా భావించే సీతమ్మ, మరియమ్మలను పూజించారట. తమ తండాను కలరా నుండి రక్షిస్తే జీవితాంతం మాంసం ముట్టబోమని ఆ తండా కోడళ్లు ఆ దేవతలకు మొక్కుకున్నారట. అదృష్టవశాత్తు కలరా ఆ తండాను తాకలేదట. అది దేవతల అనుగ్రహమేనని గట్టిగా విశ్వసించిన తండా ప్రజలు.. అప్పటి నుంచి ఈ ఆచారాన్ని తమ సంప్రదాయంగా మార్చుకొని ఇప్పటికీ కొనసాగిస్తున్నారు.ఈ ఆచారం కేవలం కోడళ్లకు మాత్రమే వర్తిస్తుంది. గ్రామ ఆడబిడ్డలు, మగవాళ్లకు ఈ నియమం ఉండదు. అయితే ఎవరైనా మాంసాహారం తినాల్సి వస్తే ఇంటి బయటే, వేరే వంట పాత్రలను ఉపయోగించి వండుకొని తిని ఆ తర్వాత స్నానం చేసి మాత్రమే ఇంటికి వస్తారు. ఈ నియమం పాటించడంలో వారు చాలా కచ్చితంగా ఉంటారు. ఈ తండాలో ప్రతి రెండేళ్లకోసారి దుర్గాభవానీ ఉత్సవాలు ఘనంగా నిర్వహిస్తారు. ఈ వేడుకకు ముందు రోజున సీతమ్మకు ప్రత్యేక పూజలు చేస్తారు. గ్రామ ప్రజలు వెండితో అమ్మవారి విగ్రహాలను చేయించి వాటిని ప్రతి ఇంట్లో ఒక పెట్టెలో భద్రపరిచి, విశేష పూజలు చేయడం కూడా ఇక్కడ ఒక ఆచారం.ఈ వింత ఆచారం గురించి తెలిసిన బయటివారికి ఆశ్చర్యం కలిగించవచ్చు. కానీ వాల్యానాయక్ తండా ప్రజలకు ఇది కేవలం ఒక ఆచారం కాదు తమను కలరా నుండి రక్షించిన దేవతలకు తామిచ్చిన మాట. ఇది వారి భక్తి, విశ్వాసం, తరతరాలుగా కొనసాగుతున్న సంస్కృతికి ప్రతీక. ఆధునిక ప్రపంచంలో ఇలాంటి సంప్రదాయాలు కొనసాగించడం అరుదుగా కనిపిస్తుంది.