O pleno municipal de Marín aprobou unha moción do PSOE para solicitar á Xunta de Galicia que estude a viabilidade de crear un novo enlace na circunvalación V.G. 4.4 que conecte directamente coa estrada entre San Xulián e o Lago de Castiñeiras. A proposta obtivo o respaldo do PP, mentres que o BNG se abstivo. Os socialistas consideran que é necesario mellorar a accesibilidade a un dos espazos naturais máis visitados da provincia. "Cremos que é moi sinxelo conectar o viario de circunvalación coa estrada que sobe ao Lago desde a casa de cultura de San Xulián", explicou o portavoz socialista Manuel Pazos, quen destacou que isto "evitaría un dos tramos máis complicados que existen, especialmente para autobuses ou caravanas". Actualmente, o acceso realízase por estradas con fortes pendentes e curvas pechas que dificultan a chegada de vehículos de gran tamaño como autobuses ou caravanas. O novo enlace, sinalan, melloraría a seguridade viaria e aumentaría a competitividade de Marín como destino turístico. Ademais, permitiría "pór en valor as parcelas municipais que existen na zona", un sistema de uso público de case 9.000 metros cadrados, indican os socialistas. A infraestrutura serviría para revitalizar as visitas ao Lago de Castiñeiras, facilitar a chegada ordenada de visitantes e reducir a presión sobre outras vías locais máis fráxiles, segundo a proposta presentada no pleno municipal.