A Xunta de Galicia e o Concello de Cerdedo-Cotobade impulsaron unha serie de importantes melloras na escola infantil de Cerdedo, pertencente á rede pública autonómica. Os traballos, que se atopan practicamente finalizados, inclúen o pintado interior completo do centro, a renovación do solo na costa de acceso para evitar resbalones e a instalación dun novo aparello de aire acondicionado. As obras, contratadas e supervisadas polo Concello, e cunha parte financiadas polo Executivo autonómico, forman parte dun programa de mellora e mantemento dos centros educativos existentes en todo o municipio. O alcalde Jorge Cubela agradeceu a visita do xerente do Consorcio de Igualdade e Benestar, Perfecto Rodríguez, e destacou a importancia da colaboración entre administracións para que as familias dispoñan das mellores instalacións posibles para a infancia. Esta actuación enmárcase no programa de melloras en centros do Consorcio, que se desenvolve ao longo de todo o ano e abarca tanto as escolas infantís como os centros de día e residenciais do municipio.