A Asociación Club de Opinión Portocelo entregará o sábado 13 de setembro os Premios "Facendo Historia" 2025, que na súa XII edición recoñecerán a traxectoria de dúas destacadas marinenses que contribuíron a pór en valor a vila dentro e fóra da súa contorna territorial. A concelleira de Cultura, Marián Sanmartín, e o promotor das xornadas, Ángel G. Carragal, presentaron no Concello os galardóns que recaerán na doutora María del Rosario García Campelo, xefa do Servizo de Oncoloxía do CHU da Coruña, e en Raquel Carragal Da Costa, licenciada e educadora en Ciencias de Actividade Física e Deportiva. Ademais, entregarase unha Mención Póstuma ao marinense Carlos Paratcha Vázquez (1900-1974), lembrado docente e apaixonado divulgador e defensor do Patrimonio Prehistórico de Marín. García Campelo será recoñecida "pola súa entrega á Oncoloxía Médica destacando polos logros e contribucións conseguidos no exercicio da súa profesión", mentres que Carragal Da Costa recibirá o galardón "polos seus retos solidarios dando visibilidade, e reivindicando maior atención por parte da Administración Pública, ás enfermidades 'raras'". Os Premios "Facendo Historia" foron instituídos en 2012 ao amparo da conmemoración do IX Centenario de Marín na Historia, celebrado no Mosteiro de Oseira. Tras un paréntesis de dous anos pola pandemia, os galardóns alcanzan xa a súa duodécima edición. A iniciativa vai "máis alá de rememorar feitos e aconteceres do noso pasado histórico" e recoñece aos marinenses que "veñen facendo historia dentro e fóra da nosa terra, vinculando o nome de Marín á súa exitosa traxectoria persoal e profesional". A cerimonia celebrarase o sábado 13 no Salón de Plenos da Casa Consistorial, comezando ás 11.30 horas coa recepción de premiados, autoridades e invitados. Ás 12.00 horas a alcaldesa María Ramallo abrirá a sesión, seguida da presentación das semblanzas por parte de Ángel G. Carragal. O acto rematará cun concerto "Facendo Historia" a cargo do Coro de Cámara Thalassa de Marín, dirixido por Gonzalo Martín Lorenzo. O premio consiste na entrega dun diploma acreditativo e unha peza de cerámica, réplica do antigo edificio do Priorado de Oseira, confeccionada polo Obradoiro "Alén das Olas" de Marín.