O novo centro de día e fogar residencial da Lama recibirá os seus primeiros usuarios antes de que remate 2025, tras cinco anos de traballo e un investimento total de máis de 500.000 euros. O xerente do Consorcio Galego de Servizos de Igualdade e Benestar, Perfecto Rodríguez, asistiu esta semana co alcalde David Carrera á xornada de portas abertas do equipamento, que está practicamente listo para iniciar a súa actividade. A Xunta achegou 300.000 euros do investimento total mentres que o resto foi asumido polo Concello. Agora, para completar as instalacións, a Administración autonómica asinou un novo convenio por 70.000 euros destinados a acondicionar o baixo e a parcela exterior, onde se instalará un parque biosaudable. O inmoble conta con dúas zonas: unha de fogar residencial con 6 prazas e outra de centro de día con entre 20 e 28 prazas de atención diúrna. Rodríguez destacou a importancia da colaboración institucional para facer realidade este recurso "fundamental para ofrecer unha atención próxima e de calidade e tamén para mellorar a conciliación das familias". Perfecto Rodríguez e David Carrera no novo Centro de Día da LamaXunta de Galicia O xerente lembrou o empeño do anterior alcalde Jorge Canda, falecido o ano pasado, por sacar adiante este proxecto que se convertirá nun recurso clave para o coidado das persoas maiores do municipio.