A rúa Adolfo Pedrido Morla, no barrio do Piñeiriño de Vilagarcía, converterase en vía de sentido único de subida cara ao complexo polideportivo de Fontecarmoa a partir do próximo martes día 2 de setembro, nunha medida destinada a mellorar a seguridade vial na zona escolar. A modificación, que afecta ao tramo comprendido entre o cruzamento con Wenceslao Fernández Flórez e a zona de estacionamento das instalacións deportivas, responde ás peticións da Asociación de Veciños e a ANPA do CEIP O Piñeiriño. A concelleira de Urbanismo, Paola María, explicou que non será necesario realizar obras, senón que se colocarán bolardos para pechar o carril máis próximo ao centro de ensino, que pasará a ser utilizado como espazo de tránsito peonil. "Estamos ante unha estrada moi transitada e en curva, o que supón un perigo para os nenos e nenas que teñen que acceder á escola pola porta central do edificio", sinalou a concelleira, quen engadiu que "os vehículos que, ata o de agora, baixaban por Adolfo Pedrido en dirección ao Piñeiriño, non tiñan boa visibilidade dos peóns que van cara Fontecarmoa". Os bolardos van instalarse de tal xeito que se poida ensanchar o carril dispoñible para vehículos, que "ata o de agora tamén era estreito, e que pasará a medir uns 3,5 metros". A parte destinada ao tránsito peonil medirá uns 2,5 metros. A circulación manterase sen cambios na zona de estacionamento do complexo polideportivo, á que se poderá chegar desde O Piñeiriño ou desde a rotonda da N-640, mantendo o dobre sentido de tráfico neste tramo. O departamento de Obras e os axentes da Policía Local instalarán os elementos e os sinais o martes, polo que o cambio será efectivo desde ese mesmo día, xusto antes do arranque do novo curso escolar.