తెలంగాణ అసెంబ్లీ వర్షాకాల సమావేశాలు ప్రారంభమయ్యాయి. ఈ సందర్భంగా ముఖ్యమంత్రి రేవంత్ రెడ్డి ఇటీవల మరణించిన మృతిపై సంతాప తీర్మానాన్ని ప్రవేశపెట్టారు. అనంతరం మాగంటి గోపీనాథ్‌తో తనకున్న వ్యక్తిగత సాన్నిహిత్యాన్ని సీఎం గుర్తు చేసుకున్నారు. తెలంగాణ రాజకీయాల్లో ఆయన పోషించిన పాత్రను కొనియాడారు. అనుకోని పరిస్థితుల్లో జూన్ 8న అనారోగ్యం కారణంగా మాగంటి మరణించడం తెలంగాణ అసెంబ్లీతో పాటు, జూబ్లీహిల్స్ నియోజకవర్గ ప్రజలకు తీరని లోటని అన్నారు. గోపీనాథ్ చూడటానికి 'క్లాస్ లీడర్‌'గా కనిపించినప్పటికీ.. ఆయన పూర్తిగా 'మాస్ లీడర్' అని అన్నారు. అనంతరం మంత్రి శ్రీధర్ బాబు, బీఆర్ఎస్ ఎమ్మెల్యే కేటీఆర్ సంతాపం తెలిపారు. తమ పార్టీకి, జూబ్లీహిల్స్ నియోజకవర్గానికి తీరని లోటని కేటీఆర్ వ్యాఖ్యనించారు. ఆయన మృతిపై సంతాపం తెలిపే రోజు వస్తుందని తాను ఉహించలేదని అన్నారు. ' ఇలాంటి ఓ రోజు వస్తుందని అస్సలు ఉహించలేదు. జూబ్లీహిల్స్ అంటే సంపన్నులు ఉండే ప్రాంతం అనుకుంటాం. కానీ ఆయన నియోజవర్గంలో చాలా వరకు పేదవారే ఉంటారు. యువకుడిగా ఉన్నప్పటి నుంచే ఆయన రాజకీయాల్లో తనదైన ముద్ర వేశారు. జూబ్లీహిల్స్ వంటి ప్రాంతంలో వరుసగా హ్యాట్రిక్ విజయం సాధించటం అంత ఈజీ కాదు. ఆయన ప్రజల మనిషిగా ఉన్నారు. జూబ్లీహిల్స్ నియోజకవర్గంలో ఆయన్ను ఆప్యాయంగా గోపన్న అని పిలుచుకుంటారు. ఈ సందర్భంగా ఓ విషయం చెప్పాలి. ఆయన చూడ్డానికి క్లాస్‌గా కనిపించినా చాలా నిరాడంబరుడు. తనకున్న అనారోగ్య సమస్యలు, ఇబ్బందుల గురించి ఏనాడు, ఎవరితోనూ చెప్పుకోలేదు. హాస్పిటల్‌లో ఆయన మరణించిన తర్వాత.. మాదాపూర్ ప్రాంతంలోని ఆయన ఇంటికి ఏర్పాట్లు చేసేందుకు నేనూ, హరీష్ రావు గారు వెళ్లాం. అక్కడ ఇంటిని చూసి షాకయ్యాం. ఓ 250, 300 గజాల్లో ఉన్న చిన్న ఇల్లు ఉంది. ఇంత సింపుల్‌గా ఆయన జీవించారు. ఊపర్ షేర్వాణి.. అందర్ షేర్వాణి అన్నట్లు ఆయన పైకి మాత్రం డబ్బున్న వ్యక్తిగా కనిపించేవాడు. ఎదైనా ఫంక్షన్ చేసినా.. విపరీతంగా డబ్బు ఖర్చు పెట్టేవారు. అక్కడి పరిస్థితి చూసి చలించిపోయాం. ముగ్గురు పిల్లలు, ఇంకా ఎవరి పెళ్లిళ్లు కాలేదు. ఎవర్ని సెట్ చేయలేదు. అంతలోనే ఇలా జరిగిపోయింది. కేసీఆర్ గారికి అత్యంత ఆప్తులు. ఆయన కుటుంబాన్ని పార్టీ తరపున ఆదుకుంటాం. అండగా ఉంటాం.' అని కేటీఆర్ తన సంతాపాన్ని వ్యక్తం చేశారు.