బిగ్‌బాస్ షోలోకి వెళ్లే అవకాశం వస్తుంది కదా అనే ఒకే ఒక్క లక్ష్యంతో నానా కష్టాలు పడి అగ్నిపరీక్ష టాప్-15లో చోటు సంపాదించుకున్నారు కొంతమంది కామనర్లు. అయితే ఇందులో నలుగురైదుగురు సోషల్ మీడియా ఇన్‌ఫ్లుయెన్సర్లు కూడా ఉన్నప్పటికీ అంత పెద్ద గుర్తింపు ఉన్నవాళ్లేం కాదు. దీంతో వాళ్లని కూడా కామనర్లే అంటూ ఈ కోటాలో కలిపేశారు. ఇక టాప్-15 నుంచి ఐదుగుర్ని ఎంపిక చేసి బిగ్‌బాస్ సీజన్-9కి పంపించేందుకు నానాకష్టాలు పడుతుంది జ్యూరీ. ఇక వీళ్లకి తోడు యాంకర్ శ్రీముఖి కూడా ఉంది.అగ్నిపరీక్ష అంటూ వీళ్లు పెట్టే పిచ్చిపిచ్చి టాస్కులకి శ్రీముఖి ఇస్తున్న కామెంట్రీ ఒక్కోసారి మరీ ఓవరాక్షన్‌లా అనిపిస్తుంది. కంటెస్టెంట్లని కనీసం గౌరవించకుండా వ్యవహరిస్తున్న తీరు ఆడియన్స్‌కి చిరాకు తెప్పిస్తుంది. రెండు మూడు ఎపిసోడ్లకి క్రితం నీకు అంత సీన్ లేదు అంటూ నవదీప్ అనడం వివాదానికి దారి తీసింది. దీనికి నవదీప్ సోషల్ మీడియాలో సారీ కూడా చెప్పాడు అది వేరే విషయం.ఇక శ్రీముఖి కూడా ఏం తక్కువ తినలేదు అన్నట్లుగానే షోలో ఉంటుంది. రీసెంట్ ఎపిసోడ్‌లో కంటెస్టెంట్ మర్యాద మనీష్‌ని నువ్వు క్లవర్ అనుకున్నాను ఫ్లవర్ అని తెలిసింది ఇప్పుడే అంటూ ఇష్టమొచ్చినట్లుగా శ్రీముఖి డైలాగులు వేసింది. ఇక లేటెస్ట్ ఎపిసోడ్‌లో అయితే శ్రీముఖి తీరు చూస్తే ఎపిసోడ్ చూడాలనే ఫీల్ కూడా రాలేదు. బిగ్‌బాస్ హౌస్‌లో ఎవరి పనులు వాళ్లే చేసుకోవాలి.. ఇంటిపని, వంటపని, క్లీనింగ్ ఇలా అన్నీ కంటెస్టెంట్లే చేసుకుంటారు. దీనికి ప్రత్యేకంగా ట్రైనింగ్ కూడా ఇవ్వాలా అనేట్టుగా ఉంది నేటి ఎపిసోడ్.అంట్లు తోమడానికి ఇంత అవసరమా?లేటెస్ట్ ఎపిసోడ్‌లో ఉన్న 15 మందిలో ముగ్గుర్ని సంచాలకులుగా పక్కన పెట్టి మూడు టీమ్‌లుగా 12 మందిని డివైడ్ చేశారు. ఇక వీరికి అంట్లో తోమడం, బట్టలు మడతపెట్టడం, ఫ్లోర్ క్లీనింగ్ పనులు అప్పగించారు. అయితే వీళ్లు చేసే పని సరిగ్గా, నీటిగా ఉందో లేదో చూసి సంచాలకులు ఓకే అంటేనే తర్వాతి పనిలోకి వెళ్లాలన్న మాట. ఈ టాస్కు ముగిసిన తర్వాతే అసలు ఆట మొదలైంది.ఏదో అంపైర్‌లాగ శ్రీముఖి తోమిని గిన్నెల దగ్గరికెళ్లి భూతద్దం ఒక్కటే తక్కువ అన్నట్లు ఇదేంటి ఇలా క్లీన్ చేశారు.. ఈ క్లీనింగ్ ఏంటి.. ఛీ ఛ అంటూ ఆ గిన్నెలు కింద పడేసి రచ్చరచ్చ చేసింది. ఏదో చెబుదామనుకున్న కంటెస్టెంట్‌ని చాలు సొల్లు ఆపు ఇక అంటూ శ్రీముఖి ఫైర్ అవ్వడం.. ఇదంతా చూస్తుంటే జ్యూరీ కంటే శ్రీముఖే ఎక్కువ అక్కడ అన్న ఫీలింగ్ కలిగింది. ఇక శ్రీముఖి చేసింది అయిపోలేదన్నట్లు చివరిలో నవదీప్ కూడా రెడీ అయ్యాడు.నా దగ్గర ఎల్లో కార్డులు ఉన్నాయి.. నేను నలుగురికి ఇచ్చేయాల్సిందే నాకు అదే కావాలి అన్నట్లుగా నవదీప్ మాట్లాడాడు. మీరు ఒక్క పని కూడా సరిగా చేయలేదు.. చాలా డిజప్పాయింట్ చేశారు.. ఇక మిమ్మల్ని జడ్డి చేయాల్సిన అవసరం లేదు.. ఈ లైట్లు, సెట్ అంతా బొక్కా అంటూ మధ్యలోనే నవదీప్ వాకౌట్ చేసి వెళ్లిపోయాడు. పక్క నుంచి ఆగు మాట్లాడదాం ఒకసారి అని అభిజిత్ అంటే అక్కర్లేదు మీరు వచ్చేయండి అంటూ నవదీప్ వెళ్లిపోయాడు. ఇలా కంటెస్టెంట్లని ఏదో పని వాళ్లలా ట్రీట్ చేస్తూ.. రెక్లెస్‌గా తీసిపడేసేటట్లు జ్యూరీ, శ్రీముఖి బిహేవియర్ ఉంది.పోనీ వీళ్లు చెప్పినట్లుగా టాప్-15లో ఉన్న కంటెస్టెంట్లు మరీ అంత జిడ్డుగాళ్లా అంటే అస్సలు కాదు. నిజానికి బిగ్‌బాస్ ప్రతి సీజన్‌లో టీమ్ హౌస్‌లోకి పంపించే చాలా మంది సెలబ్రెటీల కన్నా వీళ్లు షార్ప్‌గా ఉన్నారు.. అలానే టాస్కులు కూడా బాగా ఆడుతున్నారు. ఈ విషయాన్ని రీసెంట్ ఎపిసోడ్‌లో శ్రీముఖి కూడా ఒప్పుకుంది. మనం చాలా టఫ్ క్యాండెట్స్‌ని సెలక్ట్ చేశాం అంటూ చెప్పింది. ఇప్పుడు ఒక్కరోజులానే అంట్లు సరిగా తోమలేదంటూ వీళ్లపై అలిగి జ్యూరీ వెళ్లిపోవడమేంటో వాళ్లకే తెలియాలి. మొత్తానికి అగ్నిపరీక్ష అంటూ ఏదో ఊహించుకుంటే ఇది ఇంకేదో అయ్యేలా ఉంది.