A Xunta de Galicia aprobou este venres un extenso decreto de axudas extraordinarias para reparar os danos causados pola ola de incendios forestais que afectou ao territorio galego durante o verán de 2025, con máis de 96.500 hectáreas calcinadas en 62 municipios. O paquete de medidas, publicado este sábado 30 no Diario Oficial de Galicia, establece compensacións que van desde os 87.700 euros por falecemento ata os 1,5 millóns de euros para empresas de gran impacto socioeconómico, sen fixar un límite orzamentario para garantir que "calquera dano sexa indemnizado". Aínda que a provincia de Ourense concentrou a maior parte dos focos, o decreto aplícase a todo o territorio galego, incluíndo "zonas da provincia da Coruña e Pontevedra" que tamén resultaron afectadas polos incendios como foi o caso de Santa Cristina de Cobres no municipio de Vilaboa. As axudas esténdense a titulares de explotacións forestais, agrícolas e gandeiras, terreos cinexéticos ordenados, infraestruturas de espazos protexidos e entidades locais para sufragar gastos derivados das actuacións de emerxencia. ATA 132.000 EUROS POR VIVENDA As compensacións máis significativas destínanse a vivendas habituais afectadas, cun máximo de 132.000 euros para casos de ruína total ou rehabilitación. Para segundas residencias, o límite establécese en 66.000 euros. Adicionalmente, concederanse entre 3.300 e 16.200 euros para repor menaxe doméstico segundo o tipo de vivenda. Os afectados que deban abandonar temporalmente os seus fogares contarán cun bono de alugueiro social que cubrirá o 100% da renda mensual, máis 600 euros adicionais para gastos de aloxamento provisional, transporte ou mudanza. Os establecementos comerciais, industriais, turísticos e mercantís poderán acceder a axudas de ata 600.000 euros para cubrir danos en maquinaria, mercadorías e infraestruturas. Excepcionalmente, as empresas de "gran impacto socioeconómico" con moitos postos de traballo en risco poderán recibir ata 1,5 millóns de euros. SECTOR PRIMARIO As explotacións agrícolas e gandeiras disporán de múltiples liñas de axuda: ata 200.000 euros para reparar maquinaria e equipos, 75.000 euros por perda de produción, e 15.000 euros para alimentación complementaria do gando durante seis meses. Para cultivos específicos, establécense 12.700 euros por hectárea de viñedo afectado e 1,22 euros por quilo para produtores de castaña. A morte de animais compensarase segundo baremos específicos, con 1.600 euros por vaca de máis de 18 meses. SECTOR FORESTAL E CINEXÉTICO As explotacións forestais poderán percibir ata 15.000 euros para reparación de infraestruturas, 50.000 euros para maquinaria, outros 50.000 euros para compensar madeira perdida e ata 100.000 euros para repor reforestacións executadas desde 2020. Os terreos cinexéticos ordenados (tecores) terán acceso a 30.000 euros para sementeira de cereais e 12.000 euros para infraestruturas como comedeiros, bebedoiros e refuxios. O decreto inclúe medidas fiscais excepcionais, ampliando ata o 30 de setembro os prazos para declaracións e autoliquidacións de impostos xestionados pola Axencia Tributaria de Galicia. Os afectados quedarán exentos do canon da auga e das taxas de trámites ante a Xunta. Alfonso Rueda, presidente da Xunta, anunciou as axudasXunta de Galicia As axudas concederanse mediante concesión directa polo "interese público, social e humanitario" da situación. Desde o luns instalaranse 16 oficinas con cerca de 50 empregados públicos para atender aos afectados, ademais do servizo telefónico 012. O prazo xeral de solicitude será dun mes desde a publicación, excepto para vivendas que terán ata tres meses. As axudas serán compatibles con outras subvencións públicas e seguros privados, sempre que non superen o 100% do dano causado, e non computarán na declaración da renda. Segundo os datos oficiais, os incendios afectaron en Galicia a 144 vivendas (8 habituais e 42 segundas residencias), 11 explotacións gandeiras e obrigaron a evacuar a 400 persoas e confinar a 2.000. Todas as axudas poden consultarse nesta ligazón ao DOG.