A XIX edición da Baixada de Carrilanas de Arcade de Riba, organizada pola asociación veciñal e cultural Pozovello, a escudería Pozovello e o Concello de Soutomaior, desenvolveuse este sábado cunha participación que esgotou as 65 prazas dispoñibles, deixando a máis de 20 persoas interesadas sen poder inscribirse por cuestións de espazo e organización. A xornada comezou ás 11.00 horas coas verificacións dos vehículos, seguidas ás 12.00 horas das baixadas de adestramento previas á competición oficial, que se iniciou a partir das 17.00 horas. O circuíto, considerado moi complexo polos expertos para baixar cos vehículos sen motor empregando unicamente a forza da gravidade, presentou un desafío adicional coa chegada das chuvias con forza a partir da media tarde. Moitos dos participantes tiveron que realizar a súa baixada coa pista mollada, o que engadiu emoción á proba. Carrilana baixando na proba celebrada en SoutomaiorConcello de Soutomaior O numeroso público que seguiu a competición puido gozar tanto dos espectaculares vehículos que presentaron algúns participantes como da diversión que transmitiron durante as baixadas polas múltiples curvas do percorrido. Público na baixada de carrilanas en SoutomaiorConcello de Soutomaior Ao finalizar a baixada, en horario nocturno, o público gozou da actuación musical de Los lunes al sol. Toda a proba pode verse nesta ligazón de Youtube: O Concello de Soutomaior felicitou á organización polo "traballazo dos membros da asociación e escudería Pozovello" e reafirmou o seu apoio a estas iniciativas veciñais que "converten Soutomaior nun referente do País".