ఆంధ్రప్రదేశ్‌కు ఐటీ కంపెనీలు క్యూ కడుతున్నాయి.. తాజాగా మరో దిగ్గజ ఐటీ కంపెనీ ఎంట్రీ ఇచ్చేసింది. విశాఖపట్నంలో టీసీఎస్ కార్యకలాపాలు త్వరలో ప్రారంభం కానున్నాయి. ఈ మేరకు రుషికొండ దగ్గర ఐటీ హిల్స్‌లో కంపెనీ కార్యకలాపాలు మొదలు పెట్టడానికి ఏర్పాట్లు జరుగుతున్నాయి. మిలీనియం టవర్స్‌లో టీసీఎస్‌కు స్థలం కేటాయించారు. 2 వేల మంది ఉద్యోగులతో తొలి దశలో రెండు షిఫ్టులలో కార్యకలాపాలు ప్రారంభించనున్నారు. ఆ తర్వాత టీసీఎస్ ఉద్యోగుల సంఖ్యను 6 వేలకు పెంచే అవకాశం ఉందని చెబుతున్నారు. ఈ మేరకు టీసీఎస్ కార్యాలయం కోసం మిలీనియం టవర్స్‌లోని హిల్‌-3లో భవనాన్ని సిద్ధం చేస్తున్నారు. అక్కడ 16, 17 బ్లాక్‌లకు టీసీఎస్ పేరుతో బోర్డులు కూడా పెట్టారు. టీసీఎస్ ఉద్యోగులు పనిచేయడానికి కావలసిన వసతులు ఏర్పాటు చేస్తున్నారు. కూటమి ప్రభుత్వం అధికారంలోకి వచ్చాక టీసీఎస్ మొదటి ఒప్పందం చేసుకుంది. ఒప్పందం, స్థలం కేటాయింపు జరిగిన వంద రోజుల్లో కార్యకలాపాలు సాగేలా చూస్తామని మంత్రి లోకేష్ అన్నారు. ఈ క్రమంలోనే టీసీఎస్ కార్యకలాపాలు ప్రారంభించేందుకు పనులు వేగంగా జరుగుతున్నాయి. టీసీఎస్‌కు సరిపడా భవనాలు మిలీనియం టవర్స్‌లో ఉన్నాయి. అందుకే ఉద్యోగుల సంఖ్యను పెంచడానికి అవకాశం ఉంది. ప్రస్తుతానికి మిలీనియం టవర్స్‌లో తాత్కాలికంగా కార్యకలాపాలు కొనసాగిస్తారు.. అటు టీసీఎస్ శాశ్వత క్యాంపస్‌ ఏర్పాటుకు అడుగులు వేయనుంది. టీసీఎస్ మొత్తం రూ.1,370 కోట్ల పెట్టుబడితో 12వేల మందికి ఉపాధి కల్పించేలా ప్లాన్ చేసింది. టీసీఎస్‌కు ఐటీహిల్‌-3పై 22 ఎకరాలను.. ఎకరా 99 పైసలకు రాష్ట్ర ప్రభుత్వం కేటాయించిన సంగతి తెలిసిందే.అమరావతికి ఐబీఎంప్రముఖ టెక్నాలజీ సంస్థ ఐబీఎం అమరావతిలో అడుగు పెట్టనుంది. ఆంధ్రప్రదేశ్ రాజధాని అమరావతిలో క్వాంటమ్ వ్యాలీ టెక్ పార్క్‌ను ఏర్పాటు చేయనున్నారు. ఇక్కడ ఐబీఎం తమ క్వాంటమ్ కంప్యూటర్ సెంటర్‌ను వచ్చే ఏడాది మార్చి నాటికి ప్రారంభించాలని లక్ష్యంగా పెట్టుకుంది. క్వాంటమ్ కంప్యూటింగ్‌లో భారత్ బలమైన శక్తిగా ఎదుగుతుందని ఐబీఎం భావిస్తోంది. భవిష్యత్తులో ఈ రంగంలో అవకాశాలు ఎక్కువగా ఉన్నాయని, పరిశోధనలపై దృష్టి పెట్టాలని ఐబీఎం క్వాంటమ్ అడాప్షన్ వైస్ ప్రెసిడెంట్ స్కాట్ క్రౌడర్ తెలిపారు.భారత్‌లో 'ఐబీఎం క్వాంటమ్ సిస్టమ్ 2'ను ఏర్పాటు చేయడానికి ఐబీఎం భాగస్వామ్యం కుదుర్చుకుంది. దీనిని 2026 మార్చి నాటికి పూర్తి చేయాలని లక్ష్యంగా పెట్టుకున్నారు. అమెరికాలోని ఐబీఎం రీసెర్చ్ ప్రధాన కార్యాలయం థామస్ జే వాట్సన్ సెంటర్‌లో జరిగిన సమావేశంలో స్కాట్ క్రౌడర్ మాట్లాడారు. ప్రపంచవ్యాప్తంగా తొమ్మిది క్వాంటమ్ కంప్యూటర్ సెంటర్లను ఐబీఎం ఇదివరకే ప్రకటించింది. ప్రస్తుతం అమెరికాలో ఒకటి, జపాన్‌లో రెండు, కెనడా, దక్షిణ కొరియాల్లో ఒక్కొక్కటి చొప్పున సెంటర్లు పనిచేస్తున్నాయి. అమరావతితో పాటు స్పెయిన్, అమెరికాలోని చికాగోలో కూడా త్వరలో కేంద్రాలను ఏర్పాటు చేస్తామని క్రౌడర్ చెప్పారు.భారత్‌లో క్వాంటమ్ వ్యవస్థను అభివృద్ధి చేయడానికి ఐబీఎం ఆసక్తిగా ఉంది. దీని కోసం ఎల్‌టీఐమైండ్‌ట్రీ, ప్రభుత్వ నేషనల్ క్వాంటమ్ మిషన్, ఐఐటీ వంటి సంస్థలతో కలిసి పనిచేస్తామన్నారు. క్వాంటమ్ కంప్యూటింగ్‌లో భారత్ భవిష్యత్తులో బలమైన శక్తిగా ఎదుగుతుందని..ఈ రంగంలో విస్తృత అవకాశాలు ఉన్నందున పరిశోధనలపై ఎక్కువ దృష్టి పెట్టాలన్నారు.