Acabaron as probas. A liga en Primeira RFEF empeza para o Pontevedra Club de Fútbol coa visita este sábado 30 de agosto (17.00 horas) do Cacereño ao Estadio Municipal de Pasarón. Antes da primeira batalla, a pouco máis de 24 horas dela, Rubén Domínguez compareceu ante os medios de comunicación para valorar como chega o seu equipo ao debut. "Estamos todos dispoñibles", sinalou en relación dos 18 efectivos que tiña confirmados en plantel este venres tras a chegada de Luisao Macías e á espera das últimas fichaxes antes do peche oficial do mercado. En relación a este último o técnico avanzou de feito que "xa vai concovado. Vímolo ben no adestramento e vén para achegar". Será ademais unha estrea con certa importancia engadida, e é que o opoñente será un dos, a priori, rivais directos pola salvación, outro dos recentemente ascendidos á categoría. "Sabemos que é un rival directo e aquí desde a xornada 1 temos que meter puntos no caldeiro", afirmou Rubén. No que respecta ao Cacereño "é un equipo que lle gusta apertar e que é moi intenso", destacou. Será ademais o primeiro encontro oficial de Rubén Domínguez no Pontevedra, por iso "o que nos gustaría é que todos, tanto afección, como prensa como a cidade sintan orgullosos de nós, e o primeiro paso é que eles sintan que nos baleiramos", sinalou o preparador.