: ప్రధానమంత్రి నరేంద్ర మోదీ 7 ఏళ్ల తర్వాత చైనాలో అడుగుపెట్టారు. 2020లో గల్వాన్ లోయలో జరిగిన ఘర్షణలు, ఆ తర్వాత రెండు దేశాల మధ్య నెలకొన్న ఉద్రిక్తతలు ఇప్పుడిప్పుడే చల్లారుతున్నాయి. మరోవైపు.. భారత్, చైనాల మధ్య సత్సంబంధాలు నెలకొంటున్నాయి. భారత్‌పై భారీగా సుంకాలు విధిస్తూ.. చైనాతో వాణిజ్య యుద్ధం చేస్తున్న అమెరికాకు చెక్ పెట్టేందుకు.. భారత్, చైనాలు దగ్గరవుతుండటం ఇప్పుడు ప్రపంచవ్యాప్తంగా తీవ్ర ఆసక్తిని పెంచుతోంది. ఇక భారత్‌పై చైనా మీడియా, సోషల్ మీడియా గతంలో అక్కసు వెళ్లగక్కగా.. ప్రస్తుత పరిస్థితుల్లో మాత్రం పొగడ్తలతో ముంచెత్తుతోంది. ప్రధాని పర్యటన వేళ.. చైనా మీడియా, సోషల్ మీడియాలో నరేంద్ర మోదీపై ప్రశంసల వర్షం కురుస్తోంది. అదే సమయంలో కొందరు చైనా విషయంలో భారత్ వైఖరి పట్ల పలు అనుమానాలు కూడా వ్యక్తం చేస్తున్నారు. షాంఘై సహకార సంస్థ శిఖరాగ్ర సదస్సులో పాల్గొనేందుకు ప్రధాని మోదీ చైనా పర్యటనకు వెళ్లారు. ఇక మోదీ పర్యటనపై డ్రాగన్ మీడియా, సోషల్ మీడియా స్పెషల్ ఇంట్రెస్ట్ చూపిస్తోంది. భారత్‌పై ట్రంప్ విధిస్తున్న సుంకాల ఒత్తిడిని తట్టుకుని.. మోదీ తీసుకున్న వైఖరిపై చైనాలో హర్షం వ్యక్తం అవుతోంది. 7 ఏళ్ల తర్వాత మోదీ తమ గడ్డపై అడుగుపెడుతుండటంతో.. భారత్‌-చైనా సంబంధాలు కీలక మలుపు తిరిగాయని చైనా సోషల్ మీడియా వీబోలో ఒక నెటిజన్ చేసిన పోస్ట్ ఆసక్తికరంగా మారింది. ఇక భారత్‌పై అమెరికా విధిస్తున్న సుంకాల పట్ల ఈసారి నరేంద్ర మోదీ తీసుకుంటున్న చర్య.. చాలా కఠినంగా ఉందని షార్ట్‌ వీడియో షేరింగ్ సోషల్ మీడియా ప్లాట్‌ఫామ్ డౌయిన్‌లో ఒక నెటిజన్ పేర్కొన్నాడు. భారత్‌పై ట్రంప్ 50 శాతం సుంకాలు విధిస్తూ చేస్తున్న హెచ్చరికలపై.. రాజీకి వచ్చేందుకు మోదీ నిరాకరించారని చైనా నెటిజన్లు కామెంట్లు చేస్తున్నారు. ఈ క్రమంలోనే అమెరికా అధ్యక్షుడు డొనాల్డ్ ట్రంప్‌ నాలుగు సార్లు ఫోన్ చేసినా.. వాటిని ప్రధాని మోదీ తిరస్కరించారంటూ పెద్ద ఎత్తున సోషల్ మీడియాలో పోస్ట్‌లు పెడుతున్నారు. మోదీ తీసుకున్న ఈ కఠిన వైఖరి నిజంగానే అమెరికాను తీవ్ర గందరగోళానికి గురిచేసిందని చెబుతున్నారు. ఇక చైనా మీడియా కూడా ప్రధాని మోదీ పర్యటనపై పొగడ్తలు కురిపించింది. చైనా-భారత్ దేశాలు నాగరికతల విషయంలో భాగస్వామ్యాన్ని కొనసాగించవచ్చని.. ఈ షాంఘై కో ఆపరేషన్ ఆర్గనైజషన్ సదస్సుతో భారత్-చైనా దేశాల మధ్య సంబంధాలు మరింత మెరుగుపడే అవకాశాలు ఉన్నాయని చైనా డెయిలీ పేర్కొంది. ఇక రెండు దేశాలు సత్సంబంధాలు నెలకొల్పడం, ఒక్కటి కావడం ఇరు దేశాలకు ఉన్న ఒక ఉమ్మడి బాధ్యత అని గ్లోబల్ టైమ్స్ అభిప్రాయం వ్యక్తం చేసింది.ఇక.. ప్రస్తుత పరిణామాలపై కొందరు తీవ్ర అనుమానాలు వ్యక్తం చేస్తున్నారు. రెండో ప్రపంచ యుద్ధంలో చైనాపై దండయాత్ర చేసిన జపాన్‌ను ఓడించినందుకు గుర్తుగా చైనా నిర్వహించే విక్టరీ డేకు షాంఘై కో ఆపరేషన్ ఆర్గనైజేషన్‌కు వచ్చే ప్రపంచ దేశాల నేతలు అందరూ దాదాపు హాజరుకానున్నారు. అయితే ఇందులో భారత ప్రధాని నరేంద్ర మోదీ మాత్రం హాజరుకావడం లేదని.. దీన్ని బట్టి చూస్తే చైనాతో స్నేహం భారత్‌కు నిజంగా ఇష్టమేనా అనే అనుమానాన్ని ఒక నెటిజన్ లేవనెత్తాడు. ఇక ఇదే సమయంలో మొదట జపాన్‌లో పర్యటించిన తర్వాత.. ప్రధాని మోదీ చైనాకు వెళ్లడాన్ని కూడా చైనా నెటిజన్లు ప్రస్తావిస్తున్నారు. రెండో ప్రపంచ యుద్ధంలో జపాన్‌ చైనాపై చేసిన దాడిని నిరసిస్తూ.. సెప్టెంబర్ 3వ తేదీన చైనాలో విక్టరీ డేను నిర్వహిస్తున్నారు. తమకు వ్యతిరేకంగా నిర్వహిస్తున్న ఈ విక్టరీ డేకు హాజరు కావద్దని ప్రపంచ దేశాల నేతలకు జపాన్ విజ్ఞప్తి చేసింది.మరోవైపు.. ఆగస్ట్ 31, సెప్టెంబరు 1వ తేదీల్లో చైనాలోని తియాంజిన్‌ ప్రావిన్స్‌లో జరగనున్న ఎస్‌సీవో సదస్సులో ప్రధాని మోదీ పాల్గొననున్నారు. ఇందులో భాగంగానే చైనా అధ్యక్షుడు షీ జిన్‌పింగ్‌, రష్యా అధ్యక్షుడు వ్లాదిమిర్ పుతిన్‌ సహా వివిధ దేశాధినేతలతో ప్రధాని మోదీ సమావేశం కానున్నారు. ప్రపంచ ఆర్థిక వ్యవస్థకు స్థిరత్వం తెచ్చేందుకు భారత్‌- చైనాలు కలిసి పనిచేయాల్సిన అవసరం ఉందని.. అంతకుముందు ఒక ఇంటర్వ్యూలో నరేంద్ర మోదీ చెప్పిన విషయం తెలిసిందే.