A vendima do albariño xa comezou a finais deste mes de agosto ou está a punto de facelo na maioría dos predios da provincia de Pontevedra, cunha colleita que se presenta "sa e abundante", segundo confirma o último aviso fitosanitario da Estación Fitopatolóxica do Areeiro da Deputación. O persoal técnico destaca que nesta campaña o mildio e o oídio causaron poucos danos no territorio provincial e foron facilmente controlados cos tratamentos aplicados, o que augura unha colleita de boa calidade. Para as variedades máis tardías, os técnicos aconsellan non descoidar a vixilancia, especialmente ante a posible aparición de botrite nos grans que presenten algunha lesión. En caso de precipitacións que produzan rachos na pel da uva, recoméndase empregar produtos naturais. Nos predios cunha elevada presenza de síntomas, valórase a opción de aplicar un tratamento cúprico para reducir o nivel do inóculo na próxima vendima. Coa chegada da vendima non rematan as actuacións contra a flavescencia dourada nas zonas infestadas. O persoal técnico insiste en que as plantas afectadas deben ser eliminadas o antes posible, así como revisar as plantas próximas que presenten síntomas da enfermidade. Ademais, nas viñas con presenza importante de acariose pódese aplicar un tratamento con xofre despois da vendima para reducir as poboacións. Tamén se aconsella eliminar as plantas mortas polo ataque dos fungos da madeira e polos patóxenos do solo. Botrite en acio de albariñoEstación Fitopatolóxica do Areeiro - Deputación de Pontevedra PRAGAS O aviso inclúe observacións sobre a captura de novos adultos da Ceratitis capitata, a mosca mediterránea da froita, polo que hai que eliminar os froitos afectados das árbores e os que caen ao solo. Respecto á Cydia pomonella, a avelaíña da mazá, as súas eirugas comezan a agocharse para pasar o inverno nas fendas da cortiza. Os técnicos recomenda instalar bandas-trampa de cartón ondulado pegadas ao tronco e retiralas antes da primavera para reducir esta poboación nociva. Adulto de Ceratitis capitata no interior da trampaEstación Fitopatolóxica do Areeiro - Deputación de Pontevedra A información completa do aviso pódese consultar no sitio web da Estación Fitopatolóxica do Areeiro.