కింగ్ తన 66వ పుట్టినరోజును సెలబ్రేట్ చేసుకున్నారు. సినీ ప్రముఖులు, అభిమానులు ఆయనకు సోషల్ మీడియాలో వేదికగా శుభాకాంక్షలు తెలియజేశారు. బర్త్ డే హ్యాష్ ట్యాగ్ ని ట్రెండ్ చేశారు. ఇద్దరు కుమారులు నాగచైతన్య, అఖిల్ తన తండ్రిని కలిసి స్పెషల్ గా విషెస్ అందజేశారు. మరోవైపు ఫ్యాన్స్ ఉత్సాహాన్ని రెట్టింపు చేయడానికి 'రగడ' సినిమాని థియేటర్లలో రీ-రిలీజ్ చేశారు. నాగ్ ఈసారి తన బర్త్ డేని మరింత స్పెషల్ గా మార్చారు. తన ఇంటికి వచ్చిన అభిమానులను కలిసి మాట్లాడారు. బయటకి వచ్చి వారికి అభివాదం చేశారు. ఇదంతా బాగానే ఉంది కానీ.. ఓ విషయంలో మాత్రం ఫ్యాన్స్ డిజప్పాయింట్ అవుతున్నారు. దాదాపు నాలుగు దశాబ్దాలుగా సినీ అభిమానులను అలరిస్తున్న నాగార్జున.. ఇప్పటి వరకూ 99 సినిమాల్లో నటించారు. తన కెరీర్ లో ల్యాండ్ మార్క్ మూవీకి చేరువయ్యారు. ఆల్రెడీ ఆయన 100వ ప్రాజెక్ట్ లాక్ అయిపోయింది. డైరెక్టర్ కూడా ఫిక్స్ అయిపోయాడు. దర్శకుడి పేరు, జోనర్ ఏంటనేది నాగ్ స్వయంగా వెల్లడించారు. ప్రస్తుతానికి 'కింగ్ 100' అని పిలుచుకుంటున్న ఈ మూవీ అనౌన్స్ మెంట్ కోసం అక్కినేని ఫ్యాన్స్ కళ్లు కాయలు కాచేలా ఎదురు చూస్తున్నారు. పుట్టినరోజు సందర్భంగా ప్రకటిస్తారని అందరూ భావించారు. కానీ వారి ఆశలు అడియాశలయ్యాయి. మామూలుగా హీరోల బర్త్ డే నాడు కొత్త ప్రాజెక్ట్స్ అనౌన్స్ చేస్తుంటారు.. అప్పటికే నటిస్తున్న సినిమాలకు సంబంధించిన అప్డేట్స్ ఇస్తుంటారు. అభిమానులను ఉత్సాహపరుస్తుంటారు. కానీ నాగార్జున మాత్రం ఈసారి ఎలాంటి అప్డేట్స్ లేకుండానే తన పుట్టినరోజును జరుపుకున్నారు. తన నూరవ చిత్రాన్ని ప్రకటించలేదు. దీంతో ఫస్ట్ లుక్ లేదా టైటిల్ గ్లింప్స్ వస్తుందని ఎదురు చూసిన అభిమానులు నిరాశ చెందారు. అక్కినేని వారసులు నటిస్తున్న 'లెనిన్', 'NC 24' సినిమాల నుంచి ఎలాంటి అప్డేట్స్ లేకపోవడం వారిని డిజప్పాయింట్ చేసినట్లు తెలుస్తోంది.నాగార్జున తన 100వ చిత్రాన్ని రా. కార్తీక్ అనే తమిళ్ డైరెక్టర్ చేతిలో పెట్టారు. కథ నచ్చడంతో దర్శకుడి అనుభవాన్ని పట్టించుకోకుండా గ్రీన్ సిగ్నల్ ఇచ్చేశారు. అన్నపూర్ణ స్టూడియోస్ బ్యానర్ లో స్వయంగా నిర్మించడానికి రెడీ అయ్యారు. ఫ్యాన్స్ కోరుకునే అన్ని అంశాలు ఉండేలా ఈ కథని తీర్చిదిద్దుతున్నట్లు సమాచారం. పవర్ ఫుల్ యాక్షన్, ఫ్యామిలీ డ్రామాతో చాలా గ్రాండ్ గా ఉంటుందని ఇటీవల జగపతిబాబు హోస్ట్ గా వ్యవహరించిన 'జయమ్ము నిశ్చయంబురా' టాక్ షోలో నాగార్జున స్పష్టం చేశారు. ''కింగ్ 100 సినిమా కథని ఆరేడు నెలలుగా వండుతున్నారు. కార్తీక్ అనే తమిళ్ డైరెక్టర్. ఆల్రెడీ ఒక సినిమా డైరెక్ట్ చేసాడు. ఒక ఏడాది క్రితం కథ చెప్పాడు. అది చాలా గ్రాండ్ ఫిల్మ్. 'కూలీ' రిలీజైన తర్వాత స్టార్ట్ చేస్తాం. నా నెక్స్ట్ మూవీ అదే. ఫుల్ యాక్షన్, ఫ్యామిలీ, డ్రామా.. అన్నీ ఉంటాయి. దాంట్లో నేనే కథానాయకుడిని'' అని నాగార్జున తెలిపారు. బర్త్ డే స్పెషల్ గా ఆగస్టు 29న అనౌన్స్ చేస్తారని అనుకున్నారు కానీ.. ఎందుకనో నాగ్ సైలెంట్ గా ఉన్నారు. దీంతో అక్కినేని ఫ్యాన్స్ కాస్త హర్ట్ అయ్యారు.అయితే 'కింగ్ 100' సినిమా ప్రకటనకు నాగార్జున ప్రత్యేక ఏర్పాట్లు చేస్తున్నారని, అందుకే పుట్టినరోజు నాడు అనౌన్స్ చేయలేదని ఇండస్ట్రీలో టాక్ వినిపిస్తోంది. 'నా సామి రంగా' మాదిరిగానే ఒక స్పెషల్ గ్లింప్స్ తో ప్రకటిస్తారని అంటున్నారు. తన కెరీర్ లో ఎప్పటికీ గుర్తుండిపోయే మైలురాయి సినిమా కాబట్టే, మరిన్ని జాగ్రత్తలు తీసుకుంటున్నారని చెప్పుకుంటున్నారు. మరి త్వరలోనే అక్కినేని అభిమానులకు ఈ సినిమా గురించి అదిరిపోయే అప్డేట్ ఇస్తారేమో చూడాలి.