As praias de Montalvo e Canelas en Sanxenxo izaron a bandeira amarela de precaución tras a aparición de carabelas portuguesas, unha especie de medusa de alto perigo cuxo contacto pode ter consecuencias graves para a saúde. Tamén se detectaron exemplares nas praias de Pragueira e Silgar, aínda que en menor cantidade, segundo informan os servizos de socorrismo do municipio. Aínda que os exemplares están a chegar mortos e sen tentáculos, as autoridades adoptaron esta medida preventiva e recomendan evitar o contacto e non bañarse nas zonas onde foron avistados. Os socorristas atópanse retirando os exemplares que chegan á area e informando os usuarios sobre a situación e as precaucións necesarias. O contacto cos seus tentáculos pode provocar síntomas graves como alteracións gastrointestinais, neurolóxicas, musculares e cardiorespiratorias, co conseguinte perigo de afogamento. Ademais, poden producir sensación de queimadura, dor intensa e laceracións na pel, sendo habitual que os tentáculos queden adheridos. É típica das augas tépedas do Atlántico. Os servizos de socorrismo lembran que non se debe tocar ningún exemplar, aínda que estea morto, xa que pode liberar veleno até 48 horas despois da súa morte. En caso de avistamento, débese avisar ás autoridades ou socorristas e advertir a outros usuarios. De producirse o contacto, é necesario saír da auga inmediatamente e acudir ao servizo de salvamento. Os síntomas poden incluír náuseas, vómitos, mareos, cambras musculares, dor de cabeza, dificultade para respirar ou malestar xeneralizado, casos nos que é necesario acudir ao centro sanitario máis próximo ou chamar o 112. Para o tratamento da zona afectada, recomendan lavar unicamente con auga de mar (nunca doce), aplicar frío con xeo envolto en plástico e retirar os restos de tentáculos con pinzas ou o bordo dun obxecto ríxido, evitando o contacto directo coas mans.