As Asociacións de Nais e Pais de centros educativos de infantil e primaria de Vilagarcía de Arousa manifestaron o seu rexeitamento ás declaracións do xefe territorial de Educación, César Pérez Ares, quen demandaba un horario conxunto do colexio de Rubiáns co CEIP A Lomba para coordinar o transporte escolar. As ANPAs acusan á Xefatura Provincial de Pontevedra de "ameazar" a centros e alumnado a dez días do inicio do curso escolar. Nun comunicado conxunto, as ANPAs asinantes, entre as que se atopan a ANPA Casanova (Rubiáns), ANPA A Xunqueira (A Lomba) e ANPA Alonga (Arealonga), apoian a "xusta reivindicación" do CEIP de Rubiáns de ter un horario lectivo igual ao do resto de colexios de infantil e primaria do municipio. As asociacións rexeitan "que este cambio de horario obrigue a calquera outro Centro Educativo a cambiar o seu", e lamentan que "desde a Xefatura Provincial de Pontevedra e da Dirección Xeral de Educación non sexan capaces ou non queiran facer realidade esta demanda". Chegan a solicitar o "cese ou dimisión" dos responsables se non son quen de buscar solucións. César Pérez Ares, xefe territorial de Educación PontevedraViva O comunicado subliña a súa preocupación ante a "ameaza" de cambio de horario para os CEIP A Lomba e Arealonga, e para todo o seu alumnado, a tan poucos días do comezo do curso 2025/2026, o que tería "un grande impacto na conciliación das familias". As ANPAs non comprenden "como a Administración Pública pode seguir escudándose no convenio de transportes para non mover ficha e resolver o problema". Todas as asociacións afirman que defenderán "xuntas a inclusión e conciliación real, así como unha Educación Pública de calidade para as nosas fillas e fillos".