Pontevedra e Cacereño, dous recentemente ascendidos a Primeira RFEF, víronse as caras este sábado en Pasarón nun primeiro partido de liga que quedará gravado na historia granate. Tras o 1-1, o técnico lerezano, Rubén Domínguez, recoñeceu ter "sensación de empate. Creo que fixemos unha primeira parte na que tivemos dous erros que nos fixeron dúas ocasións claras de gol. Controlamos moi ben a situación, aínda que nos faltou desequilibrio no último terzo". Xa na segunda parte, "o equipo merece gañar e non gañamos. Temos que seguir traballando e ser exixentes con nós mesmos. Estou moi contento coa actitude do equipo, que demostrou o lema de Pasarón do 'Hai que Roelo' ata o final. O equipo creu ata o final, tentouno ata o final e baleirouse ata o final. Conseguimos un punto que fai que eles, un rival directo, perda dous. A sensación é de alegría por logralo ao final, pero tamén cremos que podiamos gañar o partido". Domínguez tamén sinalou que o Pontevedra entrou ben ao partido até o erro no medio campo que custou o gol visitante. "Estivemos uns minutos desubicados, pero volvemos entrar. É certo que non estivemos a desequilibrar moito no último terzo, pero Álex fixo dous tiros. Eses sete ou oito minutos puidéronnos custar caros", lamentou. En todo caso, "asino que nos fagan só dúas ocasións por partido nunha categoría como esta. O Pontevedra tivo a de Alain, tivemos o penalti, tivemos o gol, tivemos sete ou oito córneres. O equipo baleirouse e tentouno. Xeramos caudal, unha pena non meter o penalti porque, de facelo eses vinte minutos, ao Cacereño íanlle custar. Hai que estar contentos porque nesta categoría é moi difícil puntuar". Achega do tanto de Marqueta, Domínguez confesou que é a segunda vez que un porteiro do seu equipo marca gol. "Xa o fixo David Sotelo co Taboadela cando iamos perdendo 2-1 e fixo o 2-2", lembrou. Neste caso, "cando vin saír o balón do pé de Yelko Ía perfecta. Marqueta fixo un xiro moi bo e ao final dá igual quen marque e faga os goles. Conseguimos o primeiro punto en Pasarón e o primeiro punto da liga", valorou.