Segunda e gran xornada de competición para a flota de Vaurien na ría de Arousa. Con tres probas máis completadas este sábado en Vilagarcía, a Copa de España da clase, que organiza a Real Federación Galega de Vela coa colaboración da Deputación de Pontevedra e a Xunta de Galicia, encara xa unha recta final na que todo está por decidir. Tal e como estaba previsto, a primeira proba do día comezou de forma puntual, ás 12:00 horas, cun vento do suroeste que chegou a superar os 15 nós de intensidade, unhas condicións que foron perfectas para que os aspirante ao podio afianzasen as súas posicións na súa loita polo título. O día comezou con vitoria parcial para os primeiros xuvenís da táboa, o tándem formado por Sissel Acasuso e Jorge Campos (RCM do Abra RSC / RCM Santander), que sen dúbida están a apertar forte aos grandes favoritos da flota. Pola súa banda, Pablo Cabello e Óscar Romero (RCN Vigo), que arrincaron o día cun segundo, non fallaron e adxudicáronse dous cómodos triunfos na segunda e terceira proba do día. Con estes resultados, os vigueses continúan comandando a xeral absoluta con sete puntos e cinco de vantaxe sobre os segundos clasificados, Pedro Fernández e Carolina Iglesias (RCN Rodeira), que asinaron uns parciais 4-2-3, o que lles permite manter a prata provisional. Por detrás tampouco houbo cambios no terceiro caixón e o podio ségueno pechando Acasuso e Campos cun primeiro, un terceiro e un fóra de liña na última proba que pasa a converterse na súa descarte. Do mesmo xeito que na primeira xornada, os representantes dos clubs RCM do Abra RSC e RCM Santander son os líderes na división xuvenil. O domingo, se o tempo deixa, a primeira proba do día comezará ás 11:00 horas. O Comité de Regatas tratará de cumprir co programa e sumar o tres últimas mangas. A entrega de trofeos celebrarase ás 17:00 horas nas instalacións do Centro Galego de Vela e será a encargada de pór o broche final á cita.