Este sábado 30 de agosto, Pintos viviu a 38 edición da súa consolidada Carreira Popular, unha cita que reuniu a deportistas de disciplinas como tríatlon e atletismo, así como numerosos veciños e veciñas da parroquia. A pesar de que a choiva non deu tregua en ningún momento da tarde, os corredores souberon sobreporse ao mal tempo e gozaron dunha xornada deportiva, lúdica e familiar. O evento, impulsado pola Asociación Cultural O Máis Alto de Marcón, contou coa participación habitual de integrantes do Club Atletismo +9 Moraña e do Club Atletismo San Miguel de Marín, ademais de afeccionados de diferentes puntos da comarca que compartiron a tarde xunto a familiares e amigos. As probas arrincaron ao redor das 17:30, divididas por categorías de idade e sexo, empezando polos máis pequenos. Ao longo da xornada, a organización ofreceu auga e froita gratuíta para as persoas participantes, así como a tradicional empanada para os asistentes e a posibilidade de adquirir bebidas. O ambiente familiar foi protagonista da tarde, que culminou cos esperados sorteos dos agasallos doados por colaboradores locais, para os que se venderon rifas durante o evento.