Un traballador sufriu queimaduras nun brazo este venres tras o incendio dunha máquina hidrolimpadora no exterior dunha vivenda da rúa do Costado, na parroquia pontevedresa de Mourente. O sinistro rexistrouse pasadas as 14.00 horas cando o operario estaba a manipular o equipo. A alerta chegou ao 112 Galicia a través dun particular que explicou que ardía a máquina hidrolimpadora e que unha persoa podía precisar asistencia sanitaria. O Centro Integrado de Atención ás Emerxencias activou de inmediato un amplo dispositivo de rescate. Ata o lugar desprazáronse efectivos de Urxencias Sanitarias de Galicia-061, os Bombeiros de Pontevedra, axentes da Policía Nacional e Local, así como os voluntarios de Protección Civil do municipio. Os Bombeiros conseguiron extinguir rapidamente o lume utilizando un extintor e confirmaron que o operario que estaba a traballar coa hidrolimpadora sufriu queimaduras nun brazo como consecuencia do incendio. Tras recibir os primeiros auxilios no lugar do accidente, o traballador ferido foi trasladado ao hospital para comprobar o alcance das feridas.