భారత స్వాతంత్ర్య సమర యోధుడు నేతాజీ సుభాష్ చంద్రబోస్‌.. మరణం అంశం ఇప్పుడు మరోసారి తెరపైకి వచ్చింది. ఈ క్రమంలోనే ప్రధాని మోదీకి.. పాఫ్.. ఒక కీలక విజ్ఞప్తి చేశారు. జపాన్‌లో ఉన్న తన తండ్రి అస్థికలను తిరిగి భారత్‌కు తీసుకురావాలని ఆమె కోరారు. జపాన్‌ రాజధాని టోక్యోలోని రెంకోజి ఆలయంలో ఉన్న నేతాజీ అస్థికలను భారత్‌కు తెచ్చేందుకు కృషి చేయాలని ఆమె ప్రధాని వేడుకున్నారు.ప్రస్తుతం తనకు వయసు మీదపడుతోందని.. ఇకనైనా తన తండ్రి మరణానికి సంబంధించిన విషయంలో ఒక ముగింపు పలకడం తనకు అత్యంత కీలకమని ప్రధానికి చేసిన విజ్ఞప్తిలో అనితా బోస్ వెల్లడించారు. ఈ సమస్యను గత కొన్ని దశాబ్దాలుగా తాను మోస్తున్నానని.. దీన్ని వారసత్వంగా తన పిల్లలకు ఇవ్వాలని తాను అనుకోవడం లేదని ఆమె స్పష్టం చేశారు. నేతాజీ అస్థికలు తిరిగి భారత్‌కు తీసుకురావడం అనేది కేవలం తన వ్యక్తిగత విషయం మాత్రమే కాదని.. ఇది యావత్ భారతదేశానికి సంబంధించిన విషయమని తేల్చి చెప్పారు. ఈ సందర్భంగా నేతాజీ అస్థికలను భారత్‌కు తీసుకువచ్చేందుకు గత ప్రభుత్వం చేసిన కృషిని అనితా బోస్ గుర్తు చేసుకున్నారు. గతంలో పీవీ నరసింహారావు ప్రధానమంత్రిగా ఉన్నప్పుడు.. అప్పటి కేంద్ర ప్రభుత్వం నేతాజీ అస్థికలను తీసుకురావడానికి అనేక ప్రయత్నాలు చేసిందని తెలిపారు. ఇక.. జపాన్ దేశం ఎప్పుడూ నేతాజీని గౌరవంగానే చూసుకుందని అనితా బోస్ వెల్లడించారు.1945 ఆగస్టు 18వ తేదీన తైవాన్‌లో జరిగిన విమాన ప్రమాదంలో మరణించినట్లు అనేక నివేదికలు వెల్లడిస్తున్నాయి. అయినప్పటికీ నేతాజీ మరణం ఇప్పటికీ ఒక అంతుచిక్కని మిస్టరీగానే మిగిలిపోయింది. భారత ప్రభుత్వం ఏర్పాటు చేసిన రెండు దర్యాప్తు కమిషన్‌లు.. నేతాజీ తైపీలో జరిగిన విమాన ప్రమాదంలో మరణించినట్లు నిర్ధారించాయి. కానీ జస్టిస్ ఎంకే ముఖర్జీ కమిషన్ మాత్రం.. తైపీ విమాన ప్రమాదం జరిగిన తర్వాత కూడా నేతాజీ ప్రాణాలతోనే ఉన్నారని వెల్లడించింది. ఈ నేపథ్యంలోనే ట్యోక్యోలో ఉన్న రెంకోజి ఆలయంలో భద్రపరిచిన అస్థికలు నేతాజీ సుభాష్ చంద్రబోస్‌వేనా కాదా అనే విషయంపై ఇప్పటికీ ఎలాంటి స్పష్టత లేకపోవడం గమనార్హం.